Iha loron 1 Fevereiru 2025, Kuartél Jerál FALINTIL-Forsa Defeza Timor-Leste (F-FDTL) organiza seminario iha ambitu ba selebrasaun tinan 24 transformasaun FALINTIL ba F-FDTL. Eventu ne’e hetan partisipasaun hosi autoridade sivíl no militár oioin, inklui Diretór Interinu hosi Institutu Defeza Nasionál (IDN), Guilherme Soares.
Serimónia ne’e hahú ho aprezentasaun husi Prezidente Komité Reguladora Arte Marsiais, Dr. Otaviano da Conceicao, ne’ebé aborda misaun no dezafiu sira ne’ebé maka komisaun hasoru hodi promove prátika arte marsiál sira ne’ebé seguru no dixiplinadu iha rai-laran. Segundu orador Komisáriu Funsaun Públika, Sr. Liu Rai Tasi, ne’ebé mós hala’o knaar nu’udar Prezidente Organizasaun Juventude Timor-Leste (OJETIL), ko’alia kona-ba OJETIL nia papél istóriku no kontemporáneu iha dezenvolvimentu nasionál.
Entre sira ne’ebé marka prezensa maka Xefe Estadu Maior Jenerál F-FDTL, Tenente Jenerál Falur Rate-Laek, Xefe Estadu Maiór Jenerál, Brigadeiru Jenerál Trix, no mós ofisiál superiór sira husi F-FDTL no Polísia Nasionál Timor -Leste. (PNTL). Reprezentante sira hosi organizasaun arte marsial sira, hanesan Korka ho PSHT, marka prezensa mós, hodi destaka integrasaun entre forsa defeza sira ho entidade sivil sira iha promosaun dame no seguransa nian.
Serimónia ne’e konklui ho sesaun fotografia konjunta no aprezentasaun lembransa ba oradór sira, hodi simboliza rekoñesimentu ba ida-idak nia kontribuisaun hodi hametin instituisaun nasionál sira no promove valór sira disiplina no lideransa nian entre juventude timoroan sira.
Eventu ida-ne’e reforsa F-FDTL nia kompromisu ne’ebé la’o hela atu fó onra ba ninia istória no hametin parseria ho organizasaun oioin hodi harii Timor-Leste ida ne’ebé seguru no prosperu.#MediaIDN
|
|
