Dili, 06 Dezembru 2024 – Partisipante sira iha Kursu Primeiru Kapitaun Portu nian kompleta formasaun iha dixiplina Direitu Administrativu, ne’ebé hanorin husi profesór Dr. Avelino Coelho. Aula sira, ne’ebé hala’o iha auditóriu Institutu Defeza Nasionál (IDN) nian iha Páteo Díli, hala’o iha semana ida nia laran, hahú hosi loron 2 to’o loron 6 fulan-Dezembru tinan 2024.
Kursu ne’e iha partisipante na’in 23, mane na’in 21 no feto na’in 2, husi Komponente Navál F-FDTL, Polísia Marítima PNTL no Autoridade Marítima Nasionál. Iha loron ikus klase nian, hala’o avaliasaun ida hodi sukat partisipante sira-nia komprensaun kona-ba tópiku sira ne’ebé kobre.
Iha semana nia laran, partisipante sira iha asesu ba konteúdu fundamentál kona-ba Direitu Administrativu, inklui:
Konseitu sira kona-ba Estadu, nia órgaun sira no nasaun;
Estadu nia orijen no emerjénsia;
Karakterístika Estadu nian no ninia evolusaun ba Estadu Konstitusionál sira;
Konseitu Direitu no nia fontes (material no formal);
Fundamentu Direitu Administrativu, ninia klasifikasaun no rejime jurídiku;
Prinsípiu konstitusionál administrasaun públika no atividade administrativa nian;
Komprende funsaun públika no funsaun administrativa;
Prinsípiu fundamentál sira administrasaun públika nian no nia aplikasaun iha kontestu jurídiku Timor-Leste nian.
Tuir oráriu ne’ebé define hosi diresaun akadémika IDN, etapa tuirmai hosi kursu sei hala’o entre loron 9 no 13 fulan-Dezembru tinan 2024, ho matéria Interasaun ho Komunikasaun Sosiál (ICS), ne’ebé sei hanorin hosi profesór Dr. Fransedes Suni.
Kursu ne’e ho objetivu atu hametin kapasidade téknika no teórika husi partisipante sira, hodi kontribui ba hadi’a funsaun marítima sira iha Timor-Leste.
|
|
