Díli, 5 Dezembru 2025 — Institutu Defeza Nasionál (IDN) halo serimónia despedida ba Dosente Tenente Koronel Jorge Magalhães iha loron sesta-feira, depois hanorin durante fulan ida matéria Operasaun Konjuntina no Kombinada ba alunu Kursu Estado Maior Konjunta Integradu ba dala 4.
Serimónia ne’e hala’o hodi fo agradesimentu no apresia offisiál ba kontribuisaun importante ne’ebé Tenente Koronel Jorge Magalhães fó iha prosesu formasaun. IDN konsidera valor hosi koñesimentu, lideransa no esperiénsia profesonál ne’ebé dosente partilha ho alunu sira, hanesan parte husi esforsu atu reforsa kooperasaun institusionál entre IDN ho instrutór sira internasionál no nasional.
Diretór Interinu IDN, Dr. Nuno Corvelo Sarmento, hato’o agradesimentu ba disponibilidade no kontribuisaun dosente ne’e, ne’ebé mai husi Institutu Universitáriu Militar Portugal hodi hanorin alunu 4 CEMCI durante fulan ida. Kontribuisaun Tenente Koronel Jorge Magalhães iha periodu ne’e fó inpaktu boot ba formasaun no dezenvolvimentu kapasidade lideransa iha IDN.
Oportunidade hanesan, Tenente Koronel Jorge Magalhães espresa nia orgullu ba oportunidade atu kontribui ba IDN. Tanba hanorin fulan ida, permite nia fahe esperiénsia profesonál no aprende mós husi dinamika institutu, hodi remata servisu ofisiál ho kontente.
Reprezentante alunu CEMCI dala haat, Superintende Ismail Babo, hato’o agradesimentu ba dosente ne’e tanba partilha, koñesimentu estratéjiku, tempu, dedikasaun no profesionalismu ne’ebé fó inpaktu boot ba prosesu aprendizajen.
Tuir nia, instrutór hanesan Tenente Koronel Jorge Magalhães mak fó motivasaun boot ba alunu sira atu kontinua aprende ho espirítu lideransa no profisionálismu.
Atividade despedida remata ho entrega sertifikadu apresiasaun no prendas husi IDN, hanesan símbolu rekoñese no hametin relasaun amizade.Taka ho foto hamutuk. #MédiaIDN
