Díli, 14 Novembru 2025 —Diretór Interinu Institutu Defesa Nasionál (IDN), Dr. Nuno Corvelo Sarmento, hamutuk ho Asesor IDN Dr. José Manuel Fernandes no Diretóra Servisu Akademia Dra. Eunice Noronha, hala’o enkontru kortezia ho Adido Militar Nova Zelandia, Koronel Jeremy Ramsden, no Asesor ba F-FDTL, Chris Powell, iha Auditória IDN Palásiu Governu, iha Loron Sesta.
Enkontru kortezia ida-ne’e konsideradu momentu importante atu hametin relasaun kooperasaun entre IDN no Forsa Defeza Nova Zelandia, hanesan esforsu atu haluan liu tan área koperasaun, no formasaun ba kapasita profesionál.
Área formasaun mak sai pontu prinsipal, tanba Nova Zelandia konsideradu hanesan nasaun ho programa treinamentu avansadu. Partilha experiénsia no boa prátika husi sira bele fó kontribuisaun importante ba IDN atu adapta metodolojia ne’ebé efetivu iha ambitu akademia no profesional.
Enkontru diplomátiku ida-ne’e mós loke oportunidade atu eksplora kursu internasionál, programa bolsu no treinamentu intensivu iha Nova Zelandia, tuir esforsu kontinuu IDN atu investi iha dezenvolvimentu kapasidade no profisionalizasaun.
Interaksaun regular hanesan enkontru kortezia mak sai baze forte atu aumenta konfiansa mutua entre instituisaun sira, ne’ebé fo kontribuisaun ba kooperasaun futura, inklui seguranza rejionál no operasaun multilateral.
Koronel Jeremy Ramsden, ne’ebé rezide iha Jakarta, iha responsabilidade atu akompaña asuntu defeza ne’ebé iha relasaun direta ho Timor-Leste. Vizita ida-ne’e fó oportunidade importante ba nia atu kompriende direta prioridade, objetivu no perspetiva IDN, hodi bele planifika forma kooperasaun iha tempu oin.
Enkontru remata ho serimónia simples, iha ne’ebá IDN entrega prendas simboliku hanesan sinal amizade no kooperasaun, ho foto hamutuk hanesan marka relasaun di’ak ne’ebé kontinua hametin. #MédiaIDN
|
|
