Díli, 25 Juñu 2025 – Institutu Defeza Nasional (IDN), iha koperasaun ho Banku ANZ, realiza palestra kona ba programa Osan Minded, “Money Minded “ ba alunus Kursu Estadu Maior Konjunta Integradu (CEMCI) dala 4, ho ofisial husi PNTL ho F-FDTL ne’ebé sei pasa ba idade reforma durante loron rua, hahu 25 to’o 26 fulan ne’e , Iha auditoria IDN Palásiu Governu Díli.
Objetivu prinsipal husi palestra refere, atu reforsa koñesimentu sira kona ba jestaun finanseira, iha ambitu matéria ekonomia no finansa ne’ebé alunus sira aprende iha fulan Maiu. Atividade ida ne’e, bele ajuda partisipantes sira prepara an ba futuru, hodi jere osan ho responsabilidade iha hari negosiu ki’ik.
Diretór Ezekutivu Interinu IDN, Dr. Nuno Manuel Corvelo Sarmento, iha nia diskursu abertura hatete , IDN kontente tebes alunu no ofisial sira hetan oportunidade tan, kona ba palestra jestaun osan. Nia hato’o mós obrigadu ba Banku ANZ nia kontribuisaun liuhusi formador sira mai partilha koñesimentu pertinente ba alunu ho ofisial PNTL ho F-FDTL sira.
Palestra ne’e hala’o husi formador nain rua husi Banku ANZ, ne’ebé fó orientasaun kona ba maneira konkreta jere osan iha planu finanseiru, ne’ebé importante tebes ba ofisiál sira ne’ebé sei tama idade reforma , banhira harii inisiativa pratiku hanesan negosiu ki’ik.
Tempu hanesan , fasilitador Banku ANZ ba programa Financial Literacy, Celio Jacinto Lopes do Ceu, esplika katak programa Osan Minded dezenvolve husi ANZ desde tinan 2003, ho objetivu atu ajuda individuál sira hasai abilidade finanseira. Programa ida ne’e inklui mós Business Basics, ne’ebé fó edukasaun kona ba oinsa atu harii, jere no dezenvolve negosiu ki’ik.
Programa referidu agora hala’o iha nasaun 24 iha rejiaun Ázia-Pasífiku, no implementa liuhusi semináriu sira ne’ebé ANZ ho nia organizasaun parseiru sira fasilita ho forma gratuita. Iha Timor-Leste rasik, ANZ hahu implementa programa ne’e iha tinan 2015, no to’o agora, kuaze ema 3.000 benefisia ona.
IDN agradese ba Banku ANZ nia kolaborasaun kontínua, ne’ebé kontribui ba dezenvolvimentu koñesimentu finanseiru ba ofisiál sira husi F-FDTL no PNTL iha prosesu reforma.#MédiaIDN
|
|
