IDN Organiza Prestasaun Omenajen ba Herói Nasionál Nicolau Lobato Antes Lansa Kontrusaun Eskola Akademia Militar Konjunta

Atividade sira ne’e sei hala’o ho lema: “Husi Referendu to’o Ukun Aan, Knaar Institutu Defeza Nasionál nian ba Konsolidasaun Defeza Nasionál liu husi Hari’i Akademia Militar Konjunta.” Lema ida ne’e fó enfáziu ba kontinuidade no evolusaun sektor deféza, husi tempu istóriku Referendu 1999 to’o momentu atu konstrói lideransa deféza nian ba futuru.

Atividade importante sira hanesan parte integral husi selebrasaun Tinan Aniversáriu ba dala 15 IDN nian, ne’ebé inklui:

1. Serimónia Aniversáriu IDN ba Dala 15

Serimónia ida-ne’e mak oportunidade importante atu reflekta ba trajetória IDN iha dezenvolvimentu sektor deféza Timor-Leste. Selebrasaun ida-ne’e mós fó valor ba kontribuisaun IDN iha seguransa, estabilidade no soberania nasaun.

2. Lansamentu Primeira Pedra ba Eskola Militar Konjunta

Atividade ida ne’e marká pontu inisiál ba prozesu konstrusaun Eskola Akademia Militar Konjunta Lideransa, ne’ebé sei sai espasu formasaun profisionál ba lideransa milítar, sivil no polísia. Eskola ida ne’e sei fó kontribuisaun direto ba reforsa kapasidade institusional no lideransa nasional iha sektor defeza.

3. Komemorasaun Loron Konsulta Popular 30 Agostu

Komemorasaun ida ne’e sei halo rekorda momentu istóriku iha 1999, bainhira povu Timor-Leste halo desizaun istoriku ba destinus rasik. IDN, liuhosi evento ida ne’e, hakarak hametin spiritu nasionalizmu, espesiálmente ba jerasaun foun, atu kontinua hadomi nasaun no defende liberdade ne’ebé hetan ho sakrifísiu boot.

Atividade hirak-ne’e sei kompriende serimónia ofisiál, diskursu husi lideransa relevanti, no programa kultural atu valoriza identidade nasional, unidade no patriotizmu.

Tuir programa ne’ebé IDN prepara, hafoin misa, komitíva sira bele hakat ba Aisirimou hodi lori aifunan ba presta omenajen ba herói nasionál Nicolau Lobato iha estátua ne’ebé hala’o iha Aisirimou.

Ato fó valor ba momentu importante ne’e, Governu liu husi Ministru Defeza, Kontra-Almirante Donaciano Costa Gomes, Ph.D., hamutuk ho Ministra Solidariedade Sosiál, Verónica das Dores, no mós veteranu sira hanesan Sr. Domingos Santos (eis Komité Sentral FALINTIL), no Autoridade Munisípiu Aileu, hala’o lansamentu ofisiál ba kontrusaun Eskola Militar Konjunta F-FDTL iha área Hundolte, Suku Liu Rai, Munisípiu Aileu.

Diretor Ezekutivu Interinu IDN, Dr. Nuno Corvelo Sarmento, hateten katak IDN hala’o atividade tolu iha loron ne’e: selebrasaun aniversáriu IDN ba dala 15, lansamentu primeira pedra ba kontrusaun eskola, no komemorasaun loron Konsulta Popular ba dala 26. Eskola ne’e sei fó kontribuisaun ba formasaun líder no kuadru superior sira husi F-FDTL no PNTL, inklui mós partisipante sivil sira. Sira sei hatene trasa planu no estratéjia atu kontribui ba dezenvolvimentu Estadu-Nasaun.

Dr. Nuno hatutan tan, kontrusaun eskola akademia militar konjunta sei uza orsamentu aproximadamente USD 3 miliaun. Tuir planu, edifísiu sei kompriende dormitoriu no fasilidade modernu seluk, no sei kompleta iha tinan ida ne’e. Eskola ne’e sei akumula estudante nain 120, ho prosesu konkursa sei loke ba públiku Timor-oan liuhusi Ministériu Defeza.

Partisipante sira iha misa agradesimentu no atividadi ne’e inklui:

• Ministru Defeza, Kontra-Almirante Donaciano Costa Gomes, Ph.D.

• Ministra Solidariedade Sosiál, S.E. Verónica das Dores

• Xefe Estadu Maior F-FDTL, Brigadeiro Jenerál José da Costa Soares ‘Trix’

• Deputadu Parlamentu Nasionál,

• Komandante no Veteranus FALINTIL sira

• Provedor Direitus Umanus no Justisa, Virgílio da Silva Guterres

• Représentante PAM Aileu, Sra. Vitoria Mesquita do Rego

• Prezidente Konselhu Veteranus Munisipal Aileu Sr Zacarias de Fátima “Maputu”

• Adidu Defeza husi estadu sira: China, EUA, Portugal, Brazil no Austrália

• Autoridade Lokal Munisípiu Aileu

• Oficsiais Superiores F-FDTL no PNTL

• Alunu Kursu Estadu Maior konjunta integradu ba dala 4, ne’ebé atual tuir formasaun iha IDN.

• Estudante sira no komunidade husi Suku Liu Rai no suku vizinu sira

Iha okazuan ida ne’e, Sua Exelénsia Ministru Defeza halao asaun karitavia hodi distribui mós sasan nesesidade básika ba komunidade iha área Aitoin no Suku Liu Rai iha ambitu selebrasaun konsulta populár ba dala-26.

Eventu ida ne’e lao ho susesu tanba koordinasaun efisiente entre IDN no Autoridade Munisípiu Aileu., no komunidade iha area Hundolte Suku Liu Rai. #MédiaIDN