Díli, 04 Dezembru 2024 – Diretor Interinu Instituto Defesa Nasionál (IDN), Dr. Guilherme Soares, simu konvite formaál husi Instituto Nasionál Ciência no Teknolojia (INCT) hodi partisipa iha diskusaun estratéjiku hodi kontribui ba elabora Politika Nasionál Ciência, Teknolojia no Inovasaun (STI) iha Timor-Leste. Evento ne’e, organiza husi INCT organiza hamutuk ho OACPS (Organization of African Caribbean and Pasific States) -PSF (Policy Services Facility), iha Sala Enkontru Hotel Novo Turismo, Díli.
INCT, ne’ebé hala’o papel importante hodi promove ciência no inovasaun iha nasaun, fó énfase katak iha nesesidade atu estabelese kuadru polítiku forte atu sustenta dezenvolvimentu sustentavel iha Timor-Leste. INCT konsidera, falta polítika nasionál kompreensivu iha área STI mak hanesan desafiu ne’ebé tenke supera atu fortalese peskiza científika, aplikasaun teknolojika no inovasaun iha nasaun.
Enkontru ne’e sei envolve ekipa spesialista husi OACPS-PSF no stakeholder sira seluk hodi buka estratéjia atu kria sistema integradu ne’ebé promove uza ciência no teknolojia hanesan motór ba dezenvolvimentu sosio-ekonómiku nasionál. Diskusaun sei fó énfase mós ba área sustentabilidade, inovasaun teknolojika no financiamento ba projetu científiku sira.
Partisipasaun Diretor Interinu IDN iha evento ne’e fó prova kona-ba komprimisu IDN atu kolabora ho iniciativa inter-institusionál hodi impulsiona progresu Timor-Leste. Kontribuisaun IDN ho esperiénsia nia iha defesa no dezenvolvimentu estratéjiku sei hanesan parte importante atu garante katak polítika nasionál STI ba prioridade seguransa no soberania nasaun.
Evento ida ne’e hanesan passu importante ida iha jornada Timor-Leste hodi hametin governansa moderna, inovadora no bazeia ba evidénsia, ne’ebé mak fó énfase ba papel ciência no teknolojia iha fortalese kapasidade nasionál. #MediaIDN
|
|
