Díli, 3 Outubru 2025 –Diretór Interinu Institutu Defeza Nasionál (IDN), Dr. Nuno Corvelo Sarmento, akompaña husi Diretór Diresaun Investigasaun, Dezenvolvimentu no Inovasaun, Dr. Guilherme Soares, partisipa iha enkontru avaliasaun seguransa konjunta entre FALINTIL–Forsa Defeza Timor-Leste (F-FDTL) no Polísia Nasionál Timor-Leste (PNTL), ne’ebé realiza iha Kuartel Jenerál F-FDTL, Fatuhada, Díli.
Enkontru ne’e organiza husi Ministériu Defeza hamutuk ho Ministériu Interior, ho objetivu atu halo avaliasaun koordenasaun seguransa konjunta, bazeia ba diretiva operasaun entre F-FDTL no PNTL. Atividade ida ne’e, fó oportunidade ba lideransa seguransa atu haree kapasidade koordenasaun, komunikasaun, no estratéjia seguransa nian.
Partisipasaun IDN iha enkontru importante ne’e, fó kontribuisaun ba diskusaun kona-ba harmonia no integrasaun hanesan parte vital iha implementasaun estratéjia seguransa. Tuir IDN nia missão, enkontru sira hanesan plataforma formasaun no inspirasaun ba lideransa foun, hodi aumenta sira nia kompreensaun kona-ba dinamika seguransa nasional no kontribuisaun ba dezenvolvimentu Nasaun.
Enkontru ne’e tuir mós objetivu atu bele haree no deskobre abordagem estratéjika rejionál, hodi garante liberdade no estabiliza seguransa, liu-liu iha tempu preparativu ba serimónia ofisiál adezaun Timor-Leste ba ASEAN, komemorasaun loron Proklamasaun Independénsia ba tinan-50, no selebrasaun Tinan Foun.
Partisipante sira iha enkontru ne’e, husi Ministru Defeza, Kontra-Almirante Donaciano Costa Gomes “Pedro Klamar Fuik”,. Ministru Interior Francisco da Costa Guterres. Xefe Estadu Maior Jenerál F-FDTL Tenente Jenerál Falur Rate Laek, Komandante Jerál PNTL Komisáriu Henrique da Costa, no líder sira seluk hanesan Vise Xefe Estadu Maior Jenerál F-FDTL Major Jenerál Calisto Santos “Coliati”, Segundu Komandante Jerál PNTL Komisáriu Pedro Belo, no Xefe Estadu Maior F-FDTL Brigadeiro Jenerál José da Costa Soares “TRIX”.
Inklui Ofisial husi F-FDTL sira no Komandante PNTL husi Munisipiu sira mós partisipa iha diskusaun, hodi fortalese kooperasaun institusionál nian.#MédiaIDN
|
|
