Díli, 3 Dezembru 2025 — Institutu Defeza Nasionál (IDN), liuhosi prezidenti Komisaun Organizadora, Dr. Guilherme Soares, halo enkontru avaliasaun ho funsionáriu IDN iha Auditóriu Palásiu Governu atu haree fila fali rezultadu implementasaun Atividade Semináriu Fórum do Mar CPLP dala 5, ne’ebé hala’o iha loron 25 Novembru 2025.
Enkontru ida-ne’e iha objetivu atu avalia profundamente preparasaun no realizasaun semináriu nian, inklui parte akolhimentu ba delegasaun sira, programa ofisiál durante loron rua, asesu ba instalasaun no kondisaun téknika, hamutuk ho aspetu lojistika seluk ne’ebé relevante ba atividade Fórum do Mar CPLP.
Dr. Guilherme Soares hateten katak, haree husi nivel konteúdu, programasaun no kontextu jeral, atividade Semináriu Fórum do Mar dala 5 konsidera hetan susesu. Sucesu ida-ne’e mós rezultadu hosi apoiu institusionál, vizita ofisiál no vizita kultural ne’ebé sai parte husi programa ba delegasaun CPLP sira.
Atividade ida-ne’e kontinua kontribui ba fortalesimentu kooperasaun CPLP iha domíniu marítimu no seguransa rejionál. #Média IDN
