Díli, 3 Setembru 2025 — Institutu Defeza Nasionál (IDN), lidera husi Diretór Interinu, Dr. Nuno Corvelo Sarmento, halo enkontru jerál ho diresaun no komisaun organizadora IDN, hodi halo avaliasaun ba atividade importante tolu ne’ebé IDN realiza iha Munisípiu Aileu iha loron 30 fulan Agostu 2025 , hanesan
1. Selebrasaun Aniversáriu IDN ba dala 15
Atividade ida ne’e hatudu progresu dezenvolvimentu IDN iha domíniu defeza nasionál, no fó valor ba dignidade institusaun nian ho esperitu patriótiku.
2. Lansamentu Fatuk Dahuluk ba Eskola Akademia Militar Konjunta
Lansamentu ida ne’e marka fatuk importante ba futuru edukasaun militar iha Timor-Leste. Fatuk ne’e representa kompromisu IDN atu kontribui ba preparasaun no formasaun juventude iha área seguransa no defenza.
3. Selebrasaun Konsulta Popular ba dala 26
IDN organiza selebrasaun ida iha Aileu, hodi fó oportunidade ba jerasaun foun atu komemora momentu istóriku, no nune’e aumenta sentidu patriotizmu no konsientizasaun nasionál.
Enkontru jerál ne’e hala’o ho objetivu atu, hatan ba efektividade no impaktu husi atividade sira ne’ebé realiza. Identifika área sira ne’ebé presiza melhoria. Halo planu estratéjiku ba futuru. uza efisiente rekursu sira hanesan tempu, osan no rekursu umanu.
Informasaun sira husi prosesu avaliasaun fó base sólida ba IDN, atu halo desizaun importante iha área planeamentu, alokasaun orsamentál no politika interna.
Durante enkontru, Dr. Nuno Corvelo Sarmento hatete katak enkontru ne’e importante tebes atu fortalese komunikasaun no koordenasaun entre lideransa IDN no ekipa servisu. Nune’e mós fó espasu atu halo refleksaun konstrutivu hodi hadia kontinua atividade iha futuru.
Enkontru jerál ida ne’e envolve partisipasaun husi Diretór Jerál Jestaun Rekursu, Dra. Josefa dos Reis Gonsalves; Diretór Didi, Dr. Guilherme Soares. Diretóra Akademika, Dra. Eunice Noronha. Koordenadór Kursu Ensinu Formasaun, Superintendente Xefe Polísia António de Sá. Asesór, Dr. José Manuel Fernandes, no kargu xefia sira seluk hamutuk ho funsionáriu IDN sira. #MédiaIDN
|
|
