Dili-Institutu Defeza Nasionál (IDN) hala’o konferénsia ho tema “Prosedimentu Alfándega no Fasilitasaun ba Komérsiu Marítimu iha Timor-Leste”, diriji ba partisipante edisaun Primeiru Kursu Kapitaun Portu nian. Eventu ne’e hala’o iha auditóriu IDN, iha Palásiu Governu, no hetan partisipasaun hosi formandu na’in 18, nune’e mós reprezentante hosi instituisaun oioin ne’ebé iha ligasaun ho setór marítimu no alfándega.
Konferénsia ne’e kuarta 26 fevereiru 2025 iha auditorio IDN, Palaasiu Governu hato’o husi Diretór Nasionál Jestaun no Kumprimentu Autoridade Aduaneira, Dr. Ivo Gomes, ne’ebé ko’alia kona-ba tópiku fundamentál sira kona-ba lejislasaun alfándega no prosedimentu importasaun no exportasaun iha rai-laran. Objetivu prinsipál husi palestra ne’e atu reforsa partisipante sira-nia koñesimentu kona-ba prosesu alfándega no importánsia seguransa no transparénsia iha operasaun komersiál marítima.
Abertura no Importánsia Konferénsia nian
Diretór Interinu IDN, Dr. Guilherme Soares, iha diskursu abertura, hato’o agradesimentu ba Autoridade Aduaneira, liu-liu Dr. Ivo Gomes, ne’ebé reprezenta Komisáriu Autoridade Aduaneira, Dr. Joanico Pinto, iha konferénsia. Nia destaka katak inisiativa IDN aliña ho pilár estratéjiku haat instituisaun nian: formasaun, estudu sira, divulgasaun, hametin parseria sira no jestaun institusionál.
Eventu ne’e halo parte iha Kursu Kapitaun Portu nian, espesífiku liu iha unidade kurikulár Jestaun Portu nian, hodi reforsa importánsia koñesimentu kona-ba regulamentu alfándega nian no ninia aplikasaun prátika iha operasaun marítima sira.
Konteúdu sira ne’ebé kobre iha Palestra
Durante nia aprezentasaun, Dr. Ivo Gomes fó detalle kona-ba funsionamentu Autoridade Aduaneira nian, hodi esplika kona-ba regra sira ne’ebé regula atividade alfándega nian iha Timor-Leste, nune’e mós ninia relasaun ho regulamentu internasionál no sistema ASYCUDA, ne’ebé uza hodi prosesa operasaun aduaneira sira.
Entre tópiku prinsipál sira ne’ebé kobre maka:
Kódigu Aduaneiru no nia aplikasaun iha operasaun komersiál marítima;
Prosesu apuramentu importasaun no exportasaun iha Portu Tibar no fronteira terestre;
Portál Komérsiu Alfándega nian no fasilitasaun ba komérsiu internasionál;
Seguransa iha komérsiu marítimu no kombate prátika ilegál sira;
Uza sistema dijitál sira iha inspesaun no kontrolu alfándega nian.
Oradór destaka katak Autoridade Aduaneira hala’o papél krusiál ida hodi proteje fronteira nasionál sira, prevene entrada produtu ilegál sira no garante kobransa loloos hosi impostu no taxa alfándega nian. Nia destaka mós nesesidade ba prosedimentu sira ne’ebé efetivu ne’ebé aliña ho padraun internasionál sira atu nune’e bele atrai investimentu no impulsiona setór komersiál iha rai-laran.
Enseramentu no Rekoñesimentu
Iha konferénsia ne’e hetan partisipasaun husi membru sira husi IDN, graduadu sira husi Kursu Kapitaun Portu nian no funsionáriu sira husi instituisaun ne’e. Eventu ne’e konklui ho aprezentasaun prezente Tais no sertifikadu apresiasaun ba oradór, tuir fali ho sesaun foto ho partisipante sira.
Ho inisiativa ida ne’e, IDN reforsa ninia kompromisu atu promove dezenvolvimentu setór marítimu no portuáriu iha Timor-Leste, forma profisionál sira no haburas diálogu entre entidade sira ne’ebé responsável ba jestaun no fiskalizasaun komérsiu marítimu iha rai-laran.#MediaIDN
|
|
