Díli- Institutu Defeza Nasionál akompaña Partisipantes Primeiru Kursu Kapitaun Portu kinta feira 27 fevereiru 2025, hala’o Vizita Estudu ba portu Tibar iha parte dader no portu Díli iha parte lokraik.
Ba Media IDN reprezentante husi Instututu Defeza Nasionál Dr. Nuno Corvelo Sarmentu ne’ebé akompaña partisipantes sira hateten,objetivu husi Vizita Estudu ne’e, atu hasae esperiénsia pratika ba sira, kona-ba operasaun no jestaun portu rua ne’e nian, hametin sira-nia koñesimentu kona-ba seguransa marítima, lojístika portu no impostu ba atividade portu nian iha Timor-Leste.
Objetivu espesifika, atu hatene infraestrutura no operasaun portu rua ne’e nian, liu husi análiza ba ninia terminál sira, inklui sistema monitorizasaun, lojístika interna. Hasae sira nia Komprensaun ba papél kapitál portu nian, iha impostu no jestaun operasaun portu nian, hodi observa iha prátika regra no regulamentu tasi nian ne’ebé aplika.
Analiza implementasaun padraun seguransa marítima internasionál no protesaun ambientál, inklui medida kontrolu tráfiku marítima, kombate polísia no responde ba emerjénsia sira.
Observa dezafiu no oportunidade sira jestaun portu nian iha Timor-Leste, ne’ebé foka liu ba modernizasaun infraestrutura no impaktu ekonómiku portu nian. No Promove interasaun ho profisionál portu sira.
Vantajen husi Vizita estudu ba partisipantes sira, aprende kona-ba buat ne’ebé ita aprende husi teoria nia hanorin. permite observasaun direta ba infraestrutura no operasaun portu, hodi komplementa koñesimentu ne’ebé hetan iha aula.
Ajuda atu komprende di’ak liu tan, prosedimentu ba ro sira ne’ebé atraka, lojístika portu no jestaun tráfiku tasi nian. Nune’e Partisipante sira mós, bele komprende kona-ba Jestaun no Impostu Portuges, fó dalan ba ita atu hatene iha prátika kona-ba kapitaun Porto nia atributu sira iha regulamentu, impostu no seguransa ba operasaun marítima no portu.
Fasilita simulasaun padraun seguransa nasionál no internasionál no protesaun ambientál iha kontestu portu nian. Hadi’a kapasidade foti desizaun no haree dezafiu sira ne’ebé portu ne’e hasoru, partisipantes sira bele dezenvolve abilidade analítiku hodi rezolve problema iha senáriu kompleksu sira.
Esperiensia fó dalan ba ita atu komprende oinsá desizaun operasionál sira afeta efisiénsia no seguransa atividade portu nian, Kontaktu ho área Profisional sira. Fó oportunidade atu halo interasaun ho profisionál tasi no portu sira, hodi bele fahe esperiénsia no prátika di’ak sira.
Hasae redi kontaktu profisionál nian, ne’ebé bele ajuda partisipantes ,atu hetan oportunidade karreira iha futuru. Inklui hasae koñesimentu kona-ba Dezenvolvimentu Portuges iha Timor-Leste. Permite partisipante atu analiza papél estratéjiku portu rua nian, iha ekonomia nasionál no ninia kontribuisaun ba komérsiu externu.
Liu husi oportunidade vizita estudu ne’e, partisipantes sira hetan esplikasaun sobre natureza servisu ho regras sira iha portu rua ne’e, inklui hala’o vizita ba instalasaun sira.
Enkuantu tuir orário ne’ebé termina husi Diresaun ensinu Formasaun IDN , hahu loron 4 to’o loron 6, marsu tinan ne’e, partisipantes na’in 18, mai husi Autoridade Nasionál Maritima (AMN) na’in 6, Unidade Polísia Marítima PNTL na’in 5, Sentru Formasaun polísia Komoro na’in 1, Unidade komponente Naval F-FDTL na’in 2, Autoridade Nasionál Portuariu na’in 4. Sei hala’o estájiu profesional iha Timor Port (Porto Tibar), hodi hein ba faze gradusaun iha loron 20 Marsu tinan 2025. No Remata ho foto hamutuk. #MediaIDN
|
|
