Díli, 4 Novembru 2025 — Diretór Interinu Institutu Defeza Nasionál (IDN), Dr. Nuno Corvelo Sarmento, hamutuk ho Diretór Diresaun Investigasaun, Dezenvolvimentu no Inovasaun, Dr. Guilherme Soares, hala’o enkontru ho dosente ba matéria Operasaun Konjunta Kombinadas, Tenente Koronel Jorge Magalhães, iha auditória IDN, Palásiu Governu, Díli.
Tuir kalendáriu Servisu Akademiku IDN, matéria Operasaun Konjunta Kombinadas sei hala’o durante fulan ida, hahu husi loron 6 Novembru to’o 6 Dezembru 2025. Antes hahu aula, dosente ne’e mai husi Universidade Militar Portugal atu aprezenta an ofisiálmente ba IDN.
Tenente Koronel Jorge Magalhães sei kontinua lisaun sira nudar dosente foun, hodi subtitui Tenente Koronel Luís da Conceição, ne’ebé lori matéria Planementu Operasaun Kombate. Tanba Tenente Koronel Luís sei remata nia matéria iha aban, tuir oráriu programa ba alunu Kursu Estado Maior Konjunta Integradu iha IDN.
Nudar instrutor sénior, Tenente Koronel Jorge Magalhães iha esperiénsia boot iha kampu lideransa no operasaun militár. Nia kontribuisaun sei importante tebes ba dezenvolvimentu kapasidade lideransa iha IDN, no nia partisipasaun sei ajuda motiva estudante sira hanesan ofisial husi PNTL ho F-FDTL atu kompriende importánsia servisu iha ekipa, disiplina, no responsabilidade iha ambiente profesiona militár. #MédiaIDN
|
|
