Díli- Alunu Kursu Estadu Maior Konjunta Integradu ba Dala 4, iha loron Segunda feira ne’e partisipa iha exame Avaliasaun ba matéria Istória Militar, hafoin sira partisipa aulas durante loron 5, ne’ebé hanorin husi Koronel Koronel Benedito Dias Quintas “Punu Fanu”, atual Diretór Istória Militár F-FDTL. Iha Auditoria IDN Palásiu Governu Díli.
Avaliasaun husi materia Istória Militar iha kuruikulu Kursu Estadu Maior Konjunta Integradu ne’ebé partisipa formasaun iha Institutu Defeza Nasional (IDN) iha importánsia boot iha formasaun profesional no lideransa ba ofisiais F-FDTL no PNTL nian.
Importánsia ne’e bele konsidera iha aspetu sira ne’e, Konsolidasaun no kompreensaun ba identidádé militar nian. Istória Militar fó kompreensaun ba alunu sira kona-ba evolusaun no dezenvolvimentu forsa armada, inklui F-FDTL. Husi istória, alunu sira hatene lian-laran eskola militar nian, valor sira, no prinsipiu no tradisaun sira ne’ebé forma identidade profisionál.
Husi istória militar, alunu sira hatene liu tan kona-ba situasaun polítiku-militar iha tempu hirak ne’ebé influensia dezenvolvimentu F-FDTL. Ne’e ajuda alunu sira atu analisa desizaun estrategiku ho base iha esperiénsia pasada.
Avaliasaun fó oportunidade ba alunu sira atu reflekti no aprende hosi exempu konkretu hosi kampaña militar, konflitu, no operasaun sira iha tempu liuba. Lisaun hira ne’e bele guia preparasaun no dezenvolvimentu planu ba futura.
Estudu no avaliasaun hosi Istória Militar estimula alunu sira atu uza kapasidade kritiku, analisa fatuk sira, no hetan konkluzaun ne’ebé relevante. Kapasidade ne’e importante ba nivel lideransa iha forsa defesa.
Hodi Fó valor ba prosesu formasaun akademiku ajuda identifika nivel kompreensaun no dezenvolvimentu intelektual alunu sira. Prosesu ne’e garante katak alunu sira la’o iha nivel ne’ebé di’ak no prepara ba responsabilidade estrategika iha nivel fatin komandu.
Aktividade akademia ne’e remata ho foto hamutuk alunu ho dosente. #MédiaIDN
