Díli, 5 Agostu 2025 – Alunu Kursu Estadu Maior Konjunta Integradu (CEMCI) ba dala 4 kontinua aprende no kompriende Matéria Estudu Istória Militar Universal, ne’ebé hanorin husi Diretór Interinu Institutu Defeza Nasionál (IDN), Dr. Nuno Corvelo Sarmento.
Hanorin ne’e, realiza iha auditóriu IDN iha Palásiu Governu, Dili.
Matéria ida ne’e fó introdusaun kona-ba Estudu Istória Militar, análiza modelu no metodolojia estudu, no fó ligasaun ba konseitu no relevánsia istória militar iha kontestu pasadu no agora.
Estudu Istória Militar mak prosesu sistemátiku atu kompriende konflitu armadu sira iha tempu lalais, ho implikasaun iha aspéktu polítiku, sosiál, ekonomiku no teknólojia. Istória militár la’ós de’it fó atensaun ba funu, maibé mós fó análiza ba evolusaun estratéjia, doutrina, estrutura organizasionál no papél forsa armada iha sosiedade.
Fundamentu istória militár inklui istória funu, istória dame, instituisaun militár sira no relasaun sira ho Estadu no sosiedade.
Objetivu prinsipál estudu ne’e mak, Kompriende lógika estratéjika konflitu nian. Avalia impaktu polítiku no jeopolitiku husi funu. Analiza evolusaun teknólojia no estrutura organizasaun tropa.
Modelu análiza estórika ne’ebé uza mak hanesan tuir mai, Modelu Estratéjiku, Fó énfaze ba desizaun polítiku-estratéjiku, doutrina militár no aliansa internasionál sira. Modelu Operasionál, Ezamina kampaña militár no operasaun sira iha nivel teatru. Modelu Taktiku, Fó atensaun ba kombate direta, manejamentu tropa, kilat no unidade sira. Modelu Sosiolojiku. Analiza papél forsa militár iha sosiedade, konskrisaun obrigatória, memória no identidade nasionál.
Hanorin ne’e fó klaridade katak “husi funu la’ós de’it atu habelar polítika, maibé mós atu habelar kultura no teknólojia”, ne’ebé hatudu katak estudu istória militar fó kontribuisaun boot ba kompriensaun multidiensionál kona-ba funu nian. #MédiaIDN
|
|
