Díli, 23 Abril 2025 – Estudante sira husi Kursu Estadu Maior Konjunta Integradu ba dala 4 , halo aprezentasaun grupál kona-ba matéria Teknolojia Informasaun, ho sub-tema siber seguransa no sibernetika.
Atividade akademika importante ne’e, hala’o iha auditoriu IDN, Palásiu Governu, no fó oportunidade ba estudante sira atu loke hanoin kritiku ho lideransa teknolóji relasiona ho seguransa nasional no internasionál.
Aprezentasaun ne’e moderadu husi dosente Dr. Guilherme Soares, ne’ebé ho esperensia iha área Teknolojia Informasaun durante tinan 20 resin. Estudante sira fahe ba grupu lima (5), iha ne’ebé grupu ida-idak fó aprezentasaun ho tematika sira ne’ebé diferente, hanesan mak hanesan tuir mai:
1. Grupu Dahuluk fó aprezentasaun kona-ba siber seguransa no dominíu marítimu, ho enfaze ba vulnerabilidade iha setor marítimu sira.
2. Grupu Daruak analiza atake siber durante funu Rusia-Ukrania, no impaktu sira ba operasaun milítar.
3. Grupu Datoluk fó klarifikasaun kona-ba kasus atake ba Colonial Pipeline iha Estadu Unidos, no implikasaun estratéjika nian.
4. Grupu Dahaat explika kona-ba atake ba rede elétrika iha Ukraina. Sira destaka aspektu destrisaun psicolójiku no estratégiku husi atake ne’e, ho analize ba resposta governu Ukraina nian no apoiu internasionál.
5. Grupu Dalima analiza virus Stuxnet ne’ebé uza atu sabotajen programa nuclear Irão. Aprezentasaun ne’e fó hanoin kona-ba dominasaun digital no relevánsia estadu iha konfrontasaun sibernetika.
Aprezentasaun sira refere, importansia estratéjika siber seguransa iha era dijital ida ne’e, no evidénsia forma teknolojia bele sai ferramenta poderosa iha konflitu modernu. Diskusaun grupu ne’e, bele aumenta kapasidade no kompriensaun estudante sira atu konpriende karakter konflitu ne’ebé la’o iha espasu sibernétiku, nune’e mós fó preparasaun ba sira atu servi efetivamente iha operasaun milítar ne’ebé presiza apoiu teknolóji sibernetika. #MédiaIDN
|
|
