Díli – Instituto Defeza Nasionál (IDN) hala’o enkontru ho Sua Exelénsia Ministru Defeza Kontra Almirante Donaciano Costa Gomes “Pedro Klamar Fuik” iha segunda-feira, 10 Marsu 2025, iha auditoria IDN Palasiu Governu Díli.
Liu husi enkontru ne’e, Instituto Defeza Nasionál atualiza nia programa no despeza sira iha inisiu tinan 2025, no halo mós prespetiva ba programa sira, hodi foku ba liu prioridade IDN nian.
Ba Media IDN, Diretór Interinu IDN, Dr. Guilherme Soares, informa liu husi hasoru ne’e, Sua Exelénsia Ministru Defeza husu ba IDN, mantein ezekuta programa sira, hare liu ba kualidade iha programa akademia ligadu ho formasaun sira. Inklui mos aktividade akademia sira seidauk remata, presiza buka solusaun.
Nune’e mós, presiza IDN halo poupança ba gastu sira tenke tuir necessidade instituisaun iha, no labele fó importância ba aktividade sira laiha nesesariu ba instituisaun, hanesan viajen sira.
Ba tinan 2025, IDN kontinua ho programa Kuatru kursu Estadu Maior Konjunto Integradu no Segunda edisaun ba Kursu Mestradu, ba partisipantes sira ne’ebé kompleta ona Sestu kursu Promosaun Ofisial Superior (CPOS) ho 3 Kursu Estadu Maior Konjunto Integradu, la presiza tuir, maibe ba sira ne’ebé seidauk hetan oportunidade bele disponivel hodi partisipa.
Liu husi oportunidade ne’e, Sua Exelénsia Ministru Defeza husu ba IDN tenke halo konsolidasaun ba nia rekursu sira, nune’e bele lori instituisaun ne’e ba oin iha prosesu transformasaun Instituto Defeza Nasionál ba Instituto Universitariu Defeza Nasionál.
Alende mós, IDN presiza tau konsentrasaun hodi hala’o planeia ho programa sira ne’ebé atu implementa iha tinan 2026, tanba debate orsamentu tinan 2026 hahu besik, no hodi ajusta mós ho orsamentu.
Ba IDN, hatutan Diretór Interinu IDN, Dr. Guilherme Soares, konsidera hasoru malu ho Sua Exelénsia Ministru Defeza liu husi enkontru ne’e, pertinente tebes, hodi hetan vizaun komun ba dezenvolvimentu instituisaun IDN nian, no dezenvolvimentu Jeo-pólitika iha ita nia Nasaun. Inklui programa Jeo-pólitika mikro ho makro sira, tuir Sua Exelénsia Ministru Defeza nia, hare importante tebes tanba bele socializa asuntu defeza no segurança ba iha sidadaun ho públiku enjeral sira.
Enkontru ne’e remata ho Sua Exelénsia Ministru Defeza aproveita vizita diresaun sira hodi observa direita funsionáriu sira nia tarefas servisu. #MédiaIDN
|
|
