Díli- 8 Agostu 2025 Diresaun Ensinu Formasaun Institutu Defeza Nasionál (IDN) iha sexta-feira ne’e, akompaña alunu sira husi Kursu Estadu Maior Konjunta Integradu (CEMCI) ba dala 4, hala’o vizita estudu ba Museu Rezisténsia iha Díli. Vizita ne’e parte husi programa formasaun, iha ligasaun direto ho matéria Istória Militar, ne’ebé hanorin husi Koronel Benedito Dias Quintas, “Punu Fanu,” durante semana ida iha auditóriu IDN Palásiu Governu.
Objetivu vizita ne’e, mak atu aumenta koñesimentu sira kona-ba istória militar, ne’ebé importante tebes ba ofisial sira ne’ebé sei kompriende no kontinua kontribui ba futuru defeza nasionál. Alunu sira ne’ebé hanesan ofisial husi F-FDTL no PNTL, oras ne’e hela iha fase formasaun iha IDN.
Koordenadór Kursu Ensinu formasaun , Superintendente Xefe António de Sá, esplika katak vizita ne’e iha ligasaun direta ho matéria Istória Militar, ne’ebé kontinua iha formasaun. Nune’e IDN koordena ho Museu Rezisténsia fó oportunidade ba alunu sira mai haree diretu dokumentu no evidénsia istórika, hodi mós halo relasaun direta ho konténudu ne’ebé sira aprende iha sala.
Vizita ne’e mós fó oportunidade ba alunu sira atu kompriende lalais istória luta libertasaun nasionál, iha perspetiva istória militar no kontribuisaun sira ba evolusaun forsa seguransa no defeza iha Timor-Leste.
Tanba Diresaun Ensinu no Formasaun kompriende katak aspektu istóriku ne’e importante atu fó base solida ba formasaun karakter no spiritu nasionalista ba lider fórsas armadas. Vizita ba Museum Rezisténsia sei ajuda alunu sira hatene profundamenti kona-ba, Estratéjia no taktika iha tempu resisténsia.Lideransa militar iha tempu okupasaun.Kontribuisaun veteranus ba independénsia nasionál.
Diretór Ezekutivu Museu Rezisténsia, Senhór Jorge Alves, simu vizita ne’e ho kontente no hato’o agradesimentu ba Institutu defeza Nasional (IDN) ne’ebé lori alunu sira mai vizita bele aumenta koñesimentu kona-ba istória rezisténsia, no mós tau hanoin atu reforsa dezenvolvimentu Museu Rezisténsia iha futuru.
Nia klarifika tan katak iha planu barak atu kria kontéudu foun, maibé barreira orsamentál sei sai desafiu. Hodi ne’e, nia bolu ba Estadu no Governu atu fó atensaun ne’ebé maka’as, bele melhora kondisaun Museu Rezisténsia no konserva istória funu ne’ebé importante ba jerasaun foun, atu kompriende klaru funu husi ne’ebé, hahu husi ne’ebé, no remata iha ne’ebé.
Durante vizita, alunu sira hatudu antuziazmu no interese boot, halo observasaun no husu pergunta barak ba Funsionariu teknika Museu Resistensia , atu hetan klarifikasaun liu husi kontestu istória. #MÉDIAIDN
|
|
