Díli, 1 Dezembru 2025 – Sua Exelénsia Prezidente Repúblika, Dr. José Ramos-Horta, kondekora ho Medala Kolár Orden Timor-Leste ba eis Xefe Forsas Armadas Portugál, Almirante António Manuel Fernandes da Silva Ribeiro, iha serimónia ofisiál ezersísiu loron-aniversáriu ba Proklamasaun Unilaterál Independénsia Timor-Leste dala 50, ne’ebé hala’o iha Palásiu Governu, Díli.
Prémiu prestijadú ida ne’e konfere tuir Dekretu Prezidente Repúblika No. 83/2025, hanesan rekoñesimentu ba servisu esepsionál no kontribuisaun importante ne’ebé eis Almirante Ribeiro hatudu ona ba Timor-Leste durante tinan hirak. Dekretu ne’e subliña kontribuisaun ninia ne’ebé boot hodi hametin lasu amizade no kooperasaun entre povu Timor-Leste no Portugál, ne’ebé konsidera fundamentál ba pás, estabilidade no dezenvolvimentu nasaun nian.
Iha tempu resistensia, servisu ne’ebé Almirante António Manuel Fernandes da Silva Ribeiro halo fó benefísiu direto ba povu timoroan barak. Nia merese hetan rekoñesimentu no valorizasaun hosi Estadu. Ninia esforsu sira mós sai hanesan testemuña boot kona-ba amizade ne’ebé dura liu-ho dame entre nasaun Timor leste ho Portugal.
Orden Timor-Leste mak onra aas liu nian hosi Estadu, ne’ebé fó ba individuu sira ne’ebé kontribui ho servisu esepsionál no mérito boot ba nasaun.
Kondekorasaun ne’e fó hanoin katak povu no Estadu Timor-Leste konsidera Almirante António Manuel Fernandes da Silva Ribeiro hanesan figura importante iha fortalese relasaun Timor-Leste–Portugál, no ninia esforsu dedikadu sei kontinua husik impaktu pozitivu ba futura jerasaun. #MédiaIDN
