Díli, 8 Abril 2025 – Instituto Defesa Nasionál (IDN) hala’o serimónia despedida ba Superintendente Polísia Joni Viana, ne’ebé hala’o servisu hanesan Koordenador Kursu iha Diresaun Ensinu Formasaun IDN, durante tinan rua no balun, hahu 7 Dezembru 2023 to’o 8 Abril 2025. Serimónia ne’e hala’o iha auditoria IDN, Palásiu Governu Díli.
Diretór Interinu IDN, Dr. Guilherme Soares, hato’o agradesimentu wain ba Superintendente Polísia Joni Viana, ne’ebé hetan konfiansa husi Komandu PNTL hodi mai hala’o knar iha IDN, hanesan adidu hodi hala’o ligasaun IDN ho komandu PNTL.
Durante mandatu tinan rua ho balun, hatutan Diretór Interinu IDN, Superintendente Joni Viana ajuda tebes iha Diresaun Ensinu Formasaun. Ho nia kontribuisaun, bele sai memória ba IDN, no odamatan IDN nafatin nakloke ba ita bo’ot iha kualker momentu.
Tempu hanesan mós Superintendente Joni Viana hato’o agradesimentu ba estrutura hotu iha IDN, no ba nia lori previlejiu no onradu tebes bainhira hetan nomeisaun husi Komandu PNTL. Mai servisu iha IDN, hanesan fatin ida ne’ebé produs lideransa nasionais ho pensamentu estrategiku ba futuru Nasaun Timor-Leste.
Durante serimónia despedida, Superintendente Joni Viana hato’o nia kontente no agradesimentu wain ba IDN, tanba nia bele hetan oportunidade servisu hamutuk iha tinan barak.
Enkuantu tuir informasaun, Superintendente Polísia Joni Viana, sei hala’o servisu iha Kuartel Jeral PNTL, hodi hein orden kontinuasaun husi komandu PNTL.
Serimónia ne’e remata ho IDN entrega prendas ho sertifikadu apreziasaun ba Superintendente Joni Viana, no serimónia termina ho foto hamutuk. #MédiaIDN
|
|
