Dili, 26 Fevereiru 2025 – Nu’udar parte husi Programa Institutu Defeza Nasionál (IDN) ba tinan 2025, sei hala’o formasaun iha área defeza no seguransa ba lideransa komunitária sira iha teritóriu Timor-Leste laran tomak. Objetivu mak atu hametin abilidade xefe suku sira nian, fasilita no hadi’a dezempeñu funsaun sira.
Iha kontestu ida ne’e, iha loron 26 fulan Fevereiru tinan 2025, IDN, ne’ebé reprezenta husi Dr. Nuno Corvelo Sarmento no akompaña husi Koordenadór Ensinu no Formasaun, Superintendente Joni Viana, hala’o enkontru koordenasaun ho Diretór-Jerál Desentralizasaun no Governu Lokál Ministériu Administrasaun Estatál (MAE), Sr. António Augusto Guterres, iha salaun auditóriu MAE, iha Kaikoli, Kaikoli.
Foku husi enkontru ne’e atu define data ba formasaun. Iha inísiu, IDN planeia atu hala’o formasaun iha fulan-Marsu 2025. Maibé, hafoin avalia disponibilidade tempu no dezafiu lojístiku sira, deside atu adia eventu ne’e ba fulan-Abril. Mudansa ne’e hetan konkordánsia no aprovasaun hosi Ministériu Administrasaun Estatál.
Tuir dadus ne’ebé MAE fornese, Timor-Leste agora daudaun iha xefe suku 456, númeru ne’ebé inklui xefe suku foun 15 ne’ebé foin lalais eleitu iha eleisaun lokál. Sira hein pose no formasaun nesesáriu atu asume sira nia funsaun.
Diretór-Jerál Desentralizasaun no Podér Lokál, Antonio Augusto Guterres, destaka importánsia no relevánsia husi formasaun iha área defeza no seguransa ba líder komunitáriu sira. Nia haktuir, MAE iha kompromisu atu kompila lista kompletu xefe suku nian, iha koordenasaun ho Institutu Nasionál Administrasaun Públika (INAP), no atu transmite informasaun ba IDN ba organizasaun eventu ne’e.
Inisiativa ida ne’e reforsa kolaborasaun entre IDN no MAE, ho objetivu atu fó kbiit ba lider lokál sira atu responde di’ak liután ba dezafiu seguransa no defeza nian iha sira-nia komunidade.
|
|
