Dili – Institutu Defeza Nasionál (IDN), iha ámbitu primeiro Kursu Kapitaun Portu, organiza iha loron 21 fulan Fevereiru tinan 2025 palestra ho tema “A Importancia da Cibersegurança e a Protecção do Ciberespaço”, ne’ebé hala’o iha auditóriu IDN, iha Palásiu Governu, Díli.
Eventu akadémiku ne’e iha orador nain rua, Orador Dahuluk maka Kapitaun Mar e Guerra Hélder Filaho de Jesus, espesialista iha Seguransa Sibernétika no Defeza, graduadu iha Siénsia Militár hosi Eskola Naval, ho lisensiatura pós-graduasaun iha Sistema Informasaun hosi Institutu Enjeñaria Sistema no Informátika. Agora daudaun hanesan kandidatu ba PhD iha Relasaun Internasionál, ho énfaze iha Seguransa no Estratéjia, iha Universidade Nova de Lisboa. Kaer mós kargu hanesan Vise-Prezidente Observatóriu Ekosistema no Infraestrutura Dijitál (OEID) no hanesan Eis-Xefe Defeza Sibernétika Forsa Armada Portugál nian.
Oradór daruak maka Dr. Agostinho A. Pereira, Xefe Seguransa Sibernétika iha TIC TIMOR I.P, Mestradu iha Teknolojia Informasaun, espesializada iha Sistema Seguransa Sibernétika, husi Universidade Flinders, Austrália. Agora dadaun responsavel ba Seguransa Sibernétika iha TIC TIMOR I.P.
Adjuntu Diretór Institutu Defeza Nasionál Kapitaun Fragata Duarte Borges Loe ba Média Nasionál hateten, Objetivu prinsipál husi palestra ne’e, maka atu fornese ba partisipante sira, koñesimentu tékniku no operasionál iha siberseguransa no seguransa sibernétiku, hodi promove komprensaun kle’an liu, kona-ba dezafiu sira no estratéjia sira hodi proteje sistema dijitál sira.
Nune’e bele buka atu hametin, kapasidade institusionál sira husi entidade sira ne’ebé envolve iha defeza no seguransa sibernétika iha Timor-Leste, hodi kontribui ba dezenvolvimentu medida preventiva no reativa sira hasoru ameasa sibernétika sira.
Palestra kona-ba “A Importancia da Cibersegurança e a Protecção do Ciberespaço”tama iha kontestu ida-ne’e, fornese ba partisipante sira informasaun esensiál kona-ba dezafiu sira mundu dijitál nian, ameasa emerjente sira no estratéjia sira atu mitiga risku sibernétiku sira.
Kursu ne’ebé hala’o husi IDN iha parseria ho Autoridade Marítima Nasionál, hahú iha loron 2 fulan Dezembru tinan 2024, ho abertura husi Diretór Interinu IDN Dr. Guilherme Soares. Ho partisipantes hamutuk nain 18, mai husi Autoridade Maritima Nasional(AMN) na’in 6, Unidade Polísia Marítima PNTL, na’in 6, Unidade Komponente Naval F-FDTL na’in 2, Autoridade Nasionál Portuariu nain 4.
Tuir kalendáriu akadémiku Diresaun Ensino no Formasaun IDN nian, kursu ne’e sei hala’o maizumenus fulan tolu, hahú husi fulan Dezembru 2024 to’o fulan Marsu tinan 2025. Ho Estrutura kurrikulár kompostu husi unidade kurikular 9, ne’ebé hanorin hosi profesór nasionál no internasionál sira.
Kursu ne’e ho Objetivu prinsipál atu kontribui ba protesaun interese Timor-Leste nian iha tasi, hodi garante ezersísiu autoridade marítima ida ne’ebé efisiente no efikás. Objetivu mós atu kapasita autoridade marítima sira hodi fasilita sira nia misaun seguransa no defeza nian iha teritóriu marítimu nasaun nian.
No Objetivu Espesífiku kursu nian ne’e, atu fó formasaun ba Kapitaun Portuáriu sira iha Timor-Leste ho koñesimentu teóriku no prátiku ne’ebé esensiál ba hala’o sira-nia kna’ar. Kapasita profisionál sira, atu sai nu’udar asistente ba Kapitaun Portu sira no okupa pozisaun lideransa no jestaun nian iha Komponente Naval F-FDTL nia laran.
Promove seguransa marítima no soberania nasaun nian, hodi garante katak autoridade timoroan sira iha ferramenta nesesária atu ezerse sira-nia jurisdisaun marítima ho efetivu.
Konferénsia akompaña husi Diretór Institutu Defeza Nasionál Dr. Guilherme Soares, hetan Partisipa husi, terseiru Kursu Estadu Maior Konjunto Integradu, Partisipante Primeiro Kursu Kapitaun Portu, reprenzenta husi Polísia Sientifika Investigasaun Kriminal, husi oficiais Superiores husi F-FDTL e PNTL, Ministerio da Defesa, husi Autoridade National Comunicacao, ICT-TL, Tic Timor, husi Ministerio da Justica, Comunidade youtuber, estudante husi UNTL, DIT, Canossa, antigos alunos IDN sira, inklui Joven Universitariu sira. #MediaIDN
|
|
