Díli, 19 Novembru 2025 –Parlamentu Nasionál (PN) iha loron kuarta-feira aprova ona dotasaun Orsamentu Jerál Estado (OJE) tinan 2026 ne’ebé alokadu ba Ministériu Defeza no instituisaun tuteladu sira, hanesan FALINTIL–Forsa Defeza Timor-Leste (F-FDTL) no Institutu Defeza Nasionál (IDN), ho totalidade US$ 52,469,736.00.
Proposta OJE 2026 ida ne’e, aprezenta direktamente husi Sua Exelénsia Ministru Defeza, Kontra-Almirante Donaciano Costa Gomes “Pedro Klamar Fuik”, Ph.D., ho akompañamentu husi Diretór Interinu Institutu Defeza Nasionál, Dr. Nuno Corvelo Sarmento, Diretóra Jeral Jestaun Rekursu, Dra. Josefa dos Reis Gonçalves, no Diretór Diresaun Investigasaun, Dezenvolvimentu no Inovasaun (DIDI), Dr. Guilherme Soares.
Proposta ida ne’e pasa iha plenaria PN ho votus a favor 43, kontra 0 no abstensaun 22, hodi sustenta Programa 3, Sub-programa 5, ho atividade 20 ne’ebé relasiona diretamente ho funsaun, dezenvolvimentu no modernizasaun setor defeza.
Husi Total orsamentu Jeral Estadu tinan 2026 $ 𝟓𝟐,𝟒𝟔𝟗,𝟕𝟑𝟔.𝟎𝟎 𝐝ó𝐥𝐚𝐫𝐞𝐬. Fahe ba Ministériu defeza ho montante $ 16,258,818 dólares amerikanu, fahe ba kategoria saláriu no vensimentu hamutuk $ 3,086,253, bens no servisu hamutuk $ 12,288,869, transferénsia públika hamutuk $ 500,000 no Kapitál Dezenvolvimentu hamutuk $ 383,696.
orsamentu ba Instituisaun tuteladu hanesan FALINTIL Forsa Defeza Timor Leste hamutuk $ 34,600,530.00 no Instituto Defeza Nasionál hamutuk $ 1,610,388.00 dólares Amerikanu. #MédiaIDN
