Díli, 22 Maiu 2025 – Diretór Interinu Institutu Defeza Nasionál (IDN), Kapitaun Fragata Duarte Borges Loe, Ph.D., akompaña husi Diresaun Akademika, realiza enkontru kordenasaun ho korpu dosente orientadór ba alunus Primeiru Kursu Mestradu iha área Seguransa no Dezenvolvimentu Nasionál Sustentável iha IDN.
Objetivu prinsipal husi enkontru ne’e mak atu partilha informasaun relevante ba dosente orientador sira, hodi bele halo preparasaun adequada atu orienta alunus sira bainhira sira hala’o peskiza no elabora monografia final. Enkontru ne’e mos fó oportunidade atu diskuze dezafiu sira ne’ebé alunus no dosente bele hasoru iha prosesu ne’e.
Programa Primeiru Kursu Mestradu iha área Seguransa no Dezenvolvimentu Nasionál Sustentável iha IDN, komesa husi tinan 2022, ho 15 unidade kurikular, ne’ebé hanorin husi dosente nasionál no internasionál.
Tuir kalendáriu akademiku ne’ebé planeia husi IDN, prosesu inskrisaun no submisaun proposta peskiza husi alunus sira sei hahú iha fulan Junu. Exame ba proposta sei hala’o entre fulan Jullu no Agostu, prosesu final submisaun monografia no defeza final sei akontese iha fulan Dezembru. Exame final ba monografia sei kontinua iha fulan Janeiru to’o Fevereiru tinan 2026. #MédiaIDN
|
|
