Díli, 25 Fevereiru 2025 – Institutu Defeza Nasionál (IDN) realiza palestra ho tema “Jestaun Portu no Infraestrutura: Dezafiu iha Perspetiva Timor-Leste”, ba partisipantes husi Primeiru Kursu Kapitaun Portu, iha auditoriu IDN Palásiu Governu, Díli. Akividade ne’e hala’o ho objektivu atu fornese koñesimentu técniku no diskute dezafiu sira ne’ebé nasaun hasoru iha jestaun portuáriu, inklui prioridade ba formasaun rekursu humanu.
Orador Prinsipal: Dr. José de Oliveira Leong, Prezidente Autoridade Nasionál Portuaria (APORTIL), partilla informasaun kona-ba situasaun atual portus nasionál, dezafiu iha kapasidade rekursu humanu, no importánsia investimentu ba área estratejiku. Nia esplika katak Timor-Leste iha portus 19 ne’ebé jere husi APORTIL, maibe sei presiza fó prioridade ba treinu lokal hodi substitui dependénsia ba esperénsia estranjeiru.
Dr. Guilherme Soares, Diretór Interinu IDN, hateten katak palestra ne’e sai parte importante husi kurikulu Kursu Kapitaun Portu, ne’ebé inklui aula teória, diskusaun grupu, no palestra hodi aumenta partisipantes sira-nia konhesimentu. “IDN nia misaun mak formasaun iha área estratejika, inklui divulgasaun koñesimentu liu husi publikasaun no konferénsia,” dehan nia.
Foku ba Dezafiu: Dr. José subliña katak dezemvolvimentu rekursu humanu sai prioridade máximu, ho fókus ba reduz personál kontratadu husi rai li’ur. “Ita nia portus presiza profisionál lokál sira ne’ebé treinadu ho di’ak. Investimentu ba treinu no edukasaun mak solusaun sustentável,” enkoraja nia.
Partisipantes:Aktividade ne’e envolve estudante curso capitao porto nian, joven estajiadu sira, funsionáriu IDN, no profisionál husi setór portuáriu, ho espiritu kolaborasaun atu hasa’e koordenasaun entre instituisaun. Sesaun remata ho entrega sertifikadu apresiasaun no foto hamutuk ho orador.
|
|
