Díli- Institutu Defeza Nasionál simu Partisipantes husi Kuatru Kursu Estadu Maior Konjunto Integradu hamutuk nain 14, iha loron 7 Marsu tinan 2025, hodi kontinua formasaun ba tinan akadémia 2025 to’o 2026 ba período minimu fulan 9, No maximu tinan ida.
Partisipantes na’in 14 ne’e, mai husi Polísia Nasionál Timor Leste ho Postu Superintendente Assistente ho Superintendente hamutuk na’in 5, no na’in 9 mai husi FALINTIL Forsa Defeza Timor Leste (F-FDTL) ho postu Majór hamutuk na’in 6 husi Komponente Terestre no Kapitaun Tenente nain 3 husi Komponente Naval.
Iha aktividade aprezentasaun husi partisipantes sira, akompaña husi reprezentante superior sira husi Instituisaun PNTL ho F-FDTL
Ba Media Nasionál Adjuntu Diretór IDN, Kapitaun Fragata Duarte Borges Loe informa, ba Tinan ida ne’e, Instituto Defeza Nasionál, termina Terseiru Kursu Estadu Maior Konjunto Integradu iha tinan akadérmia 2024 to’o 2025.
No Kontinua kedan ho Kuatru Kursu Estadu Maior Konjunto Integradu ba tinan akadémia 2025 to’o 2026, hodi ohin partisipantes sira aprezenta an, mai IDN hodi hetan informasaun sira sobre regras akademia sira durante formasaun lao, para partisipate sira bele familiariza ho ambiente, antes formasaun ba modul baze, hahu iha loron 10 Marsu, semana oin.
Tanba Tuir atuál Diretór ensinu formasaun IDN ne’e, Institutu defeza Nasionl, mai ho ninia Vizaun, atu sai hanesan referénsia ida ba dezenvolvimentu hanoin estratéjiku nasionál, liu husi ninia kualidade no excelensia iha atividade hanorin, estudu, peskiza no debate, ne’ebé kontribui ba valorizasaun Forsa Armada, Forsa no Servisu Seguransa, no staff Senior Ministeriu Defeza no Interior no Administrasaun Publika.
Ho objetivu mak atu kria konsiénsia nasionál kona-ba defeza no seguransa ne’ebé bele kontribui ba dezenvolvimentu ekonómiku no sosiál liu husi ninia orientasaun ba kriasaun, transmisaun no diseminasaun kultura, koñesimentu no siénsia.
Nune’e Kuatru Kursu Estadu Maior Konjunto no Integradu , hanesan kursu kualifikasaun ida-ne’ebé ho objetivu prinsipál ba funsionáriu seniór sira husi FALINTIL – Forsa Defeza Timor-Leste (F-FDTL) no ofisiál sira husi Polisia Nasional Timor-Leste (PNTL), ho pozisaun hanesan, inklui entidade administrasaun publika sira seluk ,tuir termu rejime asesu ne’ebé define.
1. Kualifikasaun Ofisial Senior liu husi , Treinamentu ba ofisiál seniór sira ,atu hala’o funsaun sira iha nivel operasionál no estratéjiku, iha nível , nasionál ho internasionál, ba iha estrutura seniór sira F-FDTL no PNTL.
2 Atualiza no halo padraun abilidade, tuir abilidade tékniku-militar/polísia no koñesimentu husi ofisiál seniór sira F-FDTL no PNTL nian, hodi asegura katak sira, aliña ho prátika di’ak no padraun internasionál sira.
3 Treinamentu Akademiku Adekuadu, Fornese formasaun akadémiku ne’ebé forte no relevante, hodi fó dalan ba ofisiál militár no polísia seniór sira atu hasoru dezafiu globalizasaun nian, kumpre misaun sira ne’ebé atribui ona no proativu iha prosesu dezenvolvimentu nasionál sustentavel.
4 Konsolidasaun espíritu korpu , hodi Promove integrasaun no Konsolidasaun esperiénsia korpu entre ofisiál sira, hodi promove koezaun no kolaborasaun iha F-FDTL, e PNTL ho forsa ba organizasaun rai seluk ni’an.
5. Promosaun étika no liderança ba dezenvolve abilidade étika profisionál no lideransa ofisiál seniór sira-nian, prepara sira atu halo desizaun ne’ebé informadu no responsavel iha kontestu kompleksu no dezafiu sira.
6. Resposta Dezenvolvimentu Kapasidade, hodi Haforsa kapasidade ofisiál sira-nian atu responde lalais no efisiente ba krize no emerjénsia sira, iha nivel nasionál no internasionál, liu husi formasaun espesializada no simulasaun realistiku.
Iha Aktividade akadémia ne’e, akompaña husi Diretór Interinu IDN, Dr. Guilherme Soares no hetan partisipa husi reprezentante husi instituisaun PNTL ho F-FDTL, no dosente sira. No remata ho foto ofisial hamutuk, husi partisipantes terseiru to’o kuatru Kursu Estadu Maior Konjunto Integradu no Primeira Kursu Kapitaun Portu. #MédiaIDN
|
|
