Díli, 5 Maiu 2025 – Alunus kursu Estadu Maior Konjunta Integradu ba dala 4 , kontinua formasaun iha semana dahuluk fulan Maiu, ho aprendizajen kona-ba matéria Jestaun Administrativu Rekursu, ne’ebé hanorin husi Koronel Reformadu Sampaio Silva. Aulas ne’e, hala’o iha auditoriu Institutu Defeza Nasionál (IDN), iha Palásiu Governu, Díli.
Tuir oráriu husi Direksaun Ensinu no Formasaun IDN, formasaun ne’e sei la’o husi loron 5 to’o 9 Maiu. Matéria ne’e, fó énfase ba jestaun no administrasaun rekursu umanu, hanesan parte importante atu aumenta kapasidade lideransa formandu sira iha forsa seguransa no defeza.
Konténudu formasaun inklui aprezentasaun, utilizasaun biblioteka, avaliasaun, organizasaun no objetivu atu hatene importánsia jestaun rekursu umanu ba organizasaun. Lisaun sira fó tan vizaun sistemátika kona-ba prosesu jestaun rekursu, teknika ba atraisaun, adaptasaun no mantensaun ema iha organizasaun, no diskute mós tendénsia foun iha área ne’e.
Formandu sira mós aprende kona-ba modelu administrativu, konseptu no teoria sira iha jestaun rekursu umanu, inklui dezenvolvimentu kareira, avaliasaun dezempeñu, no leis relevantes hanesan Lei Publiku no Lei F-FDTL. Fokus espesiál fó ba servisu militár iha Timor-Leste, no kareira iha F-FDTL no PNTL.
Matéria ida ne’e iha pertinénsia boot ba lideransa futuru iha F-FDTL no PNTL, tanba fó orientasaun kona-ba polítika jestaun ema, lideransa, motivasaun, rekrutamentu, formasaun, no avaliasaun ba nivel estratéjiku, tátika no operasionál.
Lisaun ne’e mós fó klaridade kona-ba diferensa entre jestaun administrativu ba pessoal no jestaun morál, hanesan motivasaun, dekorasaun, lisensa, kazu moratóriu, no mós organizasaun postu ho definisaun papel lideransa iha jerarkia militar.
Nune’e Institutu Defeza Nasionál kontinua fó kontribuisaun ba dezenvolvimentu kapasidade lideransa iha Forsa Seguransa no Defeza Timor-Leste, liu husi formasaun profesionál ne’ebé prepara formandu sira atu enfrenta desafiu futuru. #MédiaIDN
|
|
