Díli, 09 Jullu 2025 — Diretór Universidade Defeza Nasionál Malázia Prof. Dato Dr. Ahmad Mujahid, ho prof Dr. Ananthan Dosente Superiór husi Fakultade Siénsia no Teknolojia Defeza, iha Institutu Edukasaun Ezekutivu NDUM, hala’o enkontru importante ho Xefi Gabinete Ministériu Defeza, Sra. Ana Carla Carrascalão Gomes, no Diretór Nasionál Kooperasaun ba Domíniu Ministériu Defeza, Kapitaun Fragata Graduadu Duarte Borges Loe, Ph.D. akompaña mós husi Diretór ensinu formasaun IDN Kapitaun Fragata Graduadu Nicolao Sousa Guterres, iha salaun MD Fatu-Hada Díli.
Fundamentu husi ekontru ne’e fó énfaze ba fortalese kooperasaun entre NDUM no Instituisaun Defeza Timor-Leste, inklui Institutu Defeza Nasionál (IDN) no Autoridade Marítima Nasionál. Diskusaun fokús ba parseria edukativu, teknik no estrategiku, hodi sustenta dezenvolvimentu sektor defeza Timor-Leste.
Delegasaun NDUM hatudu interesse atu halo parseria ho IDN, liu husi oportunidade iha formasaun, apoiu tekniku, no programa kadete konjunta. Hala’o kooperasaun ida ne’e, bele lori parte importante ba estudante Timor-Leste atu kontinua edukasaun iha Malázia, tuir kriteria no rekezitu sira ne’ebé NDUM estabelese.
Malázia mós husu Timor-Leste atu propon area kooperasaun sira, ne’ebé IDN bele identifika hodi halo proposta formal ba NDUM. Parte importante iha enkontru ne’e , fó asisténsia ba IDN kona-ba dezenvolvimentu institusional hanesan NDUM, no dezenvolvimentu programa akadémiku ne’ebé bele kontribui ba autosufisiénsia iha tempu naruk.
Iha diskusaun ne’e, NDUM mós apresia posibilidade atu simu kadete husi Timor-Leste iha kursu akademia konjunta integradu , inklui identifikasaun ba kursu relevante ne’ebé bele fó benefísiu ba IDN.
Kooperasaun ne’e sei sustenta dezenvolvimentu programa formasaun bazeia ba nesesidade spesífiku IDN, inklui oportunidade ba pesoál Timor-Leste atu kontinua mestradu, doutoramentu no programa sira seluk iha universidade publika iha Malázia.
NDUM mós hatete prontu atu oferese kursu tempu badak kona-ba jestaun rekursu defeza, seguransa nasionál, no dezenvolvimentu kapasidade, inklui metodolojia formasaun, psikolojia, pedagojia no dezenvolvimentu kurríkulu.
Inisiativa literasia dijitál hanesan parte importante kooperasaun, hodi avalia no aumenta abilidade dijitál entre pesoál no estudante sira. NDUM mos iha planu atu lança programa diploma foun bazeia ba esperiénsia pratiku, ho intensaun atu uza fundu formasaun no dezenvolvimentu iha Timor-Leste. #MédaIDN
|
|
