Díli- Instituto Defeza Nasionál ba loron 29 fulan Janeiru Tinan 2025, finaliza mós ezame monografia ba, participantes terseiru Kursu Estadu Maior Konjunto Integradu ho naran kompletu Superintendente Asistente Mario Vitor da Costa, iha auditorio IDN Palásiu governu Díli.
Aktividade akademia ne’ebé lao oras ida ho balun (Tuku 11 to’o 12:30 otl) participantes aprezenta ezame monografia ho tema “Jestaun Tránzitu no Estratéjia Seguransa Rodoviária iha Dili, Análize husi Departamentu Tránzitu no Estrada PNTL nian,” ne’ebé hetan Prezidente Júri husi Dr. Nuno Corvelo Sarmento, Orientador husi superintendente Xefi Arquimino Ramos, Ezaminador dahuluk Superintendente Xefi Agustino Gomes, Examinador daruak Dr. José Manuel Fernandes “Nakfilak” akompaña husi kordenador Ensinu Formasaun IDN, Superintendente Joni Viana.
Fundamentu prinsipal husi participantes hili tema ne’e, ho objetivu atu analiza jestaun tráfiku no seguransa estrada ohin loron. Peskiza ne’e, sei foka liu ba identifika dezafiu sira ba mobilidade urbanu iha sidade, avalia estratéjia seguransa ne’ebé eziste no propoin medida sira atu hadi’a tráfiku no asegura seguransa ba utilizadór estrada sira.
Estudu ida-ne’e ninia objetivu jerál atu kompriende dezafiu sira kona-ba jestaun tráfiku no seguransa estrada iha Dili, ho objetivu atu propoin solusaun sira ne’ebé efetivu hodi hadi’a kualidade moris populasaun nian no hamenus impaktu negativu sira husi mobilidade urbana.
Tanba Iha kontestu jestaun tráfiku no seguransa estrada iha Dili, análize kontestu ne’e ezamina dezafiu sira ne’ebé relasiona ho mobilidade urbanu no prevensaun asidente. Análize ida-ne’e konsidera fatór sosiál, ekonómiku, kulturál no estruturál sira ne’ebé diretamente influénsia kondisaun hirak-ne’e.
Departamentu Trafiku no Estrada PNTL lidera formulasaun polítika no estratéjia sira atu hadi’a jestaun tráfiku no asegura seguransa ba kondutór no peskadór sira. Ida ne’e, presiza analiza variavel sira hanesan aumentu iha númeru karreta, infraestrutura, konsiénsia públiku no ezekusaun.
Ho mós kresimentu populasaun no aumentu iha karreta sira iha Dili hamosu konjestaun, aumenta risku asidente no infraestrutura estrada sira ne’ebé barak liu. Análize ne’e ho objetivu atu buka solusaun sira ne’ebé kombina efisiénsia, sustentabilidade no seguransa.
Ho Konkluzaun Estudu ida-ne’e ko’alia liu kona-ba dezafiu prinsipál sira ne’ebé hasoru husi estratéjia jestaun tráfiku no seguransa estrada iha Dili, ne’ebé hatudu realidade ida-ne’ebé marka ho problema estruturál, sosiál, kulturál no institusionál sira.
Jestaun integradu ba tráfiku iha Dili, foka liu ba teknolojia, infraestrutura, kampaña edukasaun no adaptasaun ba prátika globál sira, bele transforma ambiente estrada lokál. Aprosimasaun ida-ne’e la’ós de’it promove seguransa no efisiénsia tráfiku, maibé mós kontribui atu harii kultura seguransa estrada ida-ne’ebé sustentavel.
Nune’e participantes rekomendasaun Bazeia ba konkluzaun estudu nian, propoin haforsa Divizaun Polisia Trafiku ho rekursu umanu no teknolojiku ne’ebé adekuadu, inklui akizisaun sistema monitorizasaun eletróniku, hanesan kamera surveilansia vídeo no rádiu. Promove formasaun regulár ba ajente tráfiku sira, foka liu ba tékniku monitorizasaun, resposta emerjénsia no ezekusaun regulamentu tráfiku.
Enkuantu ba oras ne’e dadaun Institutu Defeza Nasionál, finaliza ona ezame monografia ba partisipantes Primeiru Kursu Estadu Maior Konjunto Integradu hamutuk nain 10, no sei falta participantes na’in 5, ne’ebé sei realiza mós ezame monografia iha tempu tuir mai, bazeia orariu diresaun Akademia IDN.
Aktividades akademia ne’e, Remata ho foto hamutuk. #MediaIDN
|
|
