Díli, 19 Novembru 2025 —Alunu kursu Estadu Maior Konjuntu Integradu ba dala 4 hetan traballu kona-ba elabora Planu Operasaun Ezersísu iha kuarta-feira, iha auditoriu IDN, Palásiu Governu, Díli. Materia ida ne’e mak parte husi modul Operasaun Konjuntina no Kombinada, ne’ebé hanorin husi Dosente Tenente Koronel Jorge Magalhães.
Iha ezersísu ida ne’e, integra parte prátika akademika, alunu 14 fahe ba grupa rua. Grupu dahuluk fó énfase ba dezenhu mapa operasionál, entretantu grupu daruak halo brífing kona-ba Analiza Misaun nian. Ezersísu refere sei aprezenta ofisiálmente iha loron 20 Novembru 2025.
Atividade prátika ida-ne’e fó vantajen boot ba alunu sira, aumenta kapasidade atu planifika operasaun ho abordajen sistemátika, estruturadu no koordinadu. Komprensaun barak kona-ba interoperabilidade entre forsa sira hanesan F-FDTL, PNTL no parseiru internasionál. Aplika análize situasaun, fatin, kapasidade forsa no rekursu hanesan membru Estadu Maior.
Atividade iha grupu mós fó oportunidade atu hadia komunikasaun efektivu no tomada de desizaun kolektivu. Simulasaun prátika ida ne’e prepara alunos atu prontu ba desáfiu profisionál no operasionál iha kariéra futura.
Ezersísu ne’e la’ós de’it parte hodi kompleta kurríkulu akademiku, maibé fundamentál atu hadia prontidaun profisionál no kompeténsia militar iha nivel Estadu Maior. #MédiaIDN
