Díli- Institutu Defeza Nasionál (IDN) iha loron 14 fulan Novembru Tinan 2024, kontinua realiza enkontru hodi ekipa Ajensia dezenvolvimentu Nasional (ADN) hasoru malu direita ho ekipa Konsultan PT Perencanaan Jaya ne’ebé hala’o dezeñu ba kampus foun IDN , ne’ebé hari iha area Hundolte, Suku Liu Rai, Munisipiu Aileu.
Diretór Interinu IDN Dr, Guilherme Soares iha abertura hateten, hasoru malu entre ekipa ADN ho PT Perencanaan Jaya ba ohin loron importante tebes, para bele hadia asuntu tekniku balu rekomenda husi ADN iha diskusaun tekniku ba dezeñu kampus foun IDN, para konsultor dezeñu bele toma nota, hodi hadia diak liu tan, antes hakat ba faze tenderizasaun.
Tanba enkontru ne’e, aktividade kontinuasaun husi aktividade antes hasoru malu, liu husi enkontru virtual ne’ebé hanesan ita hotu hatene, la dun maximu, nune’e ita hotu halo kordenasaun hodi ohin hasoru malu direita iha enkontru ne’e, hodi hala’o diskuasaun ho efetivu liu tan.
Diretór interinu IDN ne’e hatutan, dezeñu ba mega projetu kampus foun IDN Aileu, iha faze Verifikasaun ba faze final, maibe sei iha asuntu tekniku importante balun ne’ebé presiza hala’o diskusaun liu, husi hasoru malu ida ne’e, entre IDN nain ba projetu, Konsultan PT Perencanaan Jaya, Ajensia Dezenvolvimentu Nasional (ADN) , hare ba rezultadu dezeñu para bele apar ho kritéria tekniku ne’ebé hato’o husi ADN.
Hanesan nain ba mega projetu ne’e, IDN iha esperansa liu husi diskusaun tekniku ida ne’e, bele hetan rezultadu ne’ebé pozetivu lori benefisia ba ita hotu, hodi fasilita prosesu tenderisaun bele lao tuir kritéria hira ne’ebé aplika. Nune’e iha prosesu implementasaun bele lao ho diak no tuir estandarte ne’ebé iha hotu espera.
Tanba tuir nia, IDN finaliza ona faze legalidade administrasaun sobre estatuto rai hodi hari kampus foun IDN iha Aileu ho rai kuaze 47 hektaris, husi Ministériu Justisa. rai ne’e, entrega gratuita husi Komunidade Suku Liu rai, Munisipiu Aileu ho esperensa kampus foun IDN bele hahu realiza ona nia prosesu konstrusaun hodi fó esperensa ba komunidade em jeral sira.
Ho ne’e, IDN mai nafatin ho esperansai katak, diskusaun husi ekipa tekniku ADN ho Konsultan PT Perencanaan Jaya sobre dezeñu, ohin hanesan diskusaun ba faze ikus, IDN prontu nafatin atu hala’o kordenasaun, tanba mega projetu ne’e hanesan projetu estratejia ne’ebé sai fatin estudus iha area defesa no seguransa ba jerasaun futuru Timor-Leste nian. #MediaIDN
|
|
