Aileu, 9 Outubru 2025 –Ekipa konjunta husi Institutu Defeza Nasionál (IDN), Autoridade Postu Administrativu Aileu Vila, Direksaun Obras Públiku Munisípal Aileu, Direksaun Terras no Propriedadi, no Direksaun Agrikultura, hamutuk ho komunidade rai-nain sira iha área Aitoin, Suku Liurai, Munisípiu Aileu, hala’o atividade sukat no haluan estrada ho luan metru 6, atu sae ba kontrusaun Eskola Akademia Militar Konjunta iha área Hundolte, Suku Liurai.
Durante prosesu ne’e, Diresaun Obras Públiku hare possibilidade sira atu kontínua ho haluan estrada. Nune’e mós, Diresaun Terras no Propriedadi halo verifikasaun kona-ba fatin ne’ebé estrada sei pasa, atu hare se iha impaktu ba uma no propriedade komunidade. Direksaun Agrikultura mós rekolhe informasaun kona-ba ai-horis no rekursu agrikultura seluk ne’ebé bele afeitadu iha prosesu haluan ne’e.
Atividade haluan estrada husi estrada bo’ot to’o Eskola Akademia Militar Konjunta ho distánsia kilómetru ida ho balun , hala’o ho susesu tanba iha apoiu boot husi komunidade sira. prosesu ne’e la fó impaktu negatívu ba uma komunidade.
Hafoin haluan estrada remata, dadus sira ne’ebé rekolha husi instansia relevante sei prepara iha relatoriu espesiál, hodi submete ba nivel superior atu konsidera kontinuidade prosesu. No bele fó biban ba kompaña hodi ateru Estrada refere ne’ebé foin Haluan .
Atualmente, progresu kontrusaun Eskola Akademia Militar Konjunta mak iha faze halo fundasaun no ateru rai henek. #MédiaIDN
|
|
