Díli- Diretór Ensinu Formasaun Institutu Defeza Nasionál Kapitaun Tenente Duarte Borges Loe, ho Kordenador Kursu Superintendente Joni Viana, ho Diretór Diresaun Investigasaun Dezenvolvimentu Inovasaun, ne’ebé hanesan mós dosente ba matéria istória militál Dr. Nuno Corvelo Sarmento, iha loron 19 Fulan Dezembru tinan 2024, akompaña partisipantes Kursu Estadu Maior Konjunto integradu ba dala 3, hamutuk nain 15, vizita estudu ba Gabinete G7+ iha Díli.
Objetivu husi vizita ne’e, atu fornese informasaun ba partisipantes sira ne’ebé durante kursu iha Institutu Defeza Nasional, hodi aumenta kompriensaun kle’an liután, kona-ba dinámika internasionál no rejionál sira, nune’e mós mekanizmu kooperasaun entre nasaun dezenvolvidu sira. Tanba G7+ nu’udar organizasaun intergovernamental ida-ne’ebé halibur nasaun sira ne’ebé afetadu husi konflitu no frajilidade hodi fahe esperiénsia no apoia malu hodi buka pás no dezenvolvimentu sustentavel.
Nune’e benefisiu husi Vizita estudu ba participantes sira, habelar Koñesimentu Istoriku no Militar sira, sei bele korrelasa dezafiu istóriku sira ne’ebé Timor-Leste hasoru ho dezafiu sira husi nasaun G7+ sira seluk, kompriende di’ak liu tan estratéjia rezolusaun konflitu no rekonstrusaun pos-konflitu.
Aumenta tan sira nia koñsimentu Estudu kona-ba Asuntu Rejional no Internasional, Interasaun Estudu Afrika no ASEAN ho G7+ sei fornese informasaun ne’ebé folin-boot kona-ba realidade nasaun Afrika no membru ASEAN sira-nian, hodi haforsa koñesimentu husi bei-oan sira kona-ba jeopolitika no relasaun internasionál.
Iha Organizasaun Rejional no Konflitu sira seluk, participantes sira sei aprende kona-ba importánsia organizasaun rejionál sira-nian atu promove pás no estabilidade, nune’e mós tipu konflitu oioin no sira-nia rezolusaun.
Dezenvolvimentu abilidade operasionál no estratéjika, através Vizita ne’e, sei fó dalan ba partisipantes sira atu observa oinsá estratéjia sira ne’ebé dezenvolve ona iha G7+ bele aplika iha kontestu operasionál no estratéjiku sira, iha nivel nasionál no internasionál.
Aumenta mós sira nia abilidade ba Padraun koñesimentu Akademiku: Interasaun ho peritu sira, Troka esperiénsia sei tulun padraun koñesimentu akadémiku relevante, prepara oficial PNTL ho F-FDTL sira atu hala’o papél lideransa ho efetivu liu.
Vizita ida-ne’e, hanesan oportunidade exesionál ida ba partisipantes, sira husi kursu Estadu Maior Konjunto no Integradu, atu habelar sira-nia horizonte akadémiku no pratiku, no ba Institutu Defeza Nasional atu afirma fali sira-nia kompromisu ba excelensa iha formasaun ba lider estratéjiku sira.
Tempu hanesan Sekretariu Jerál G7+, Sua Exeléncia Dr. Helder da Costa, hato’o agradese wain ba Instituto Defeza Nasional ne’ebé akompaña ona partisipantes kursu Estadu Maior konjunto Integradu husi oficial PNTL ho F-FDTL, ne’ebé durante turi formasaun iha IDN, vizita estudu ba organizasaun G7+, hodi hatene klean organizasaun ne’e nia aktividade no programa sira.
Organizasaun G7+, hari iha loron 10 fulan Abril tinan 2010 iha Díli Timor Leste, nudar organizasaun intergovernamental ne’ebé maka halibur hamutuk Nasaun 20, afeita husi konflitu no fragilidade no mós iha tranzisaun ba iha rezilensia rekuperasaun husi konflitus.
Ho nia objetivu halo advokasia ba hari paz no hari estadu tuir nasaun espesifiku ida –idak nia kontestu nu’udar fundasaun ba dezenvolvimentu ne’ebé sustentável. No mós promove paz iha rai laran liu husi dialogu ne’ebé inkluzivu hanesan kondisaun ba dezenvolvimentu.
Fasilita koperasaun entre Nasaun membros sira atu, bele fahe esperensia no aprende ba malu iha área hari paz, no hari Estadu liu husi programa koperasaun entre nasaun frajil.
Vizita estudu ne’e, remata ho parte rua entrega prendas ba malu hodi hametin amizade, no foto Konjunta. #MediaIDN
|
|
