Díli, 15 Abril 2025 – Instituto Defeza Nasionál (IDN) hala’o serimónia despedida ba estudante estajiu na’in 6, husi Eskola Sekundária Tékniku Vokasionál Katólika Mater Mesericordia (ESTVC-MM) Lauala, Gleno Ermera. Ne’ebé realiza iha auditoriu IDN iha Palásiu Governu, Díli.
Estudante estajiu na’in 6 mai husi departamentu Turismu no Informátika, no hala’o estajiu profesional iha IDN durante fulan tolu, hahu husi loron 21 Janeiru to’o loron 15 Abril tinan 2025. Estajiu ne’e, ho objetivu atu kompleta parte prátika husi sira nia aprendizajen iha nível ensino sekundáriu tékniku vokasionál.
Liu husi serimónia ne’e, Diretór Rekursus Humanus IDN, Dr. Fernando Sousa hateten, estajiu profesionál importante tebes ba estudante sira atu hetan esperiénsia iha servisu administrasaun publiku . Tanba Estajiu hanesan programa akademika ida, atu estudante sira bele koñese no adapta an ba realidade servisu.
Diretor Eskola ESTVC-MM, Frater Francisco Maia, hato’o agradesimentu ba IDN ne’ebé fo oportunidade no kolaborasaun, tau matan, eduka, orienta estudante sira durante estajiu. Nune’e eskola nafatin mai ho esperansa atu kolaborasaun ne’e, kontinua iha tempu oin.
Representante estudante, Cesalia Maria da Gloria Maia, hato’o obrigadu ba IDN,tanba oportunidade ne’ebé fó sira, atu aprende esperiénsia importante durante estajiu. Hodi sira aprende buat barak, inklui profisionál no moralidade.
Reprezentante Diretor Interinu IDN, Dr. Nuno Corvelo Sarmento, hato’o parabéns no motivasaun ba estudantes estajiu sira ne’ebé remata ona jornada estajiu iha IDN. Tanba , tempu estajiu ne’e , la’ós deit tempu atu kumpri tarefa, maibé momentu ne’ebé bele marka duni imi nia dezenvolvimentu pessoal no profisionál.
Durante estajiu, maske estudantes enfrenta dezafiu sira, maibe deskobre talentu foun, aprende husi erru, no liu tan, hatudu kerajem no dedikasaun. Atitude hanesan responsabilidade, kuriozidade, kapasidade atu servisu hamutuk no vontade atu aprende mak sai valor importante iha estajiu. Valores ne’e, bele sai aliadu forte ba estudante iha futuru.
Dr. Nuno mós hato’o obrigadu wain ba edukadór sira no diretores sira ne’ebé fó orientasaun no motivasaun ba estudante sira. edukadór sira nia papel importante duni, tanba sira fó laran no sai matadalan atu alunu sira bele hetan futuru naroman.
Mensajen importante mak fó hanoin ba estudante sira atu kontinua aprende, mehi nafatin, no fó forsa atu hetan objetivu. Timor-Leste presiza imi – ho preparasaun, konsiensia no determinasaun, imi bele kontribui ba nasion ne’e.
Iha serimónia despidida, IDN fó sertifikadu ba estudante estajiu na’in 6, hodi rekoñese sira nia kontribuisaun. Tanba kolaborasaun boot ho Escola Sekundária Tékniku Vokasionál Katólika Mater Mesericordia (ESTVC-MM) iha Lauala, Gleno, Ermera, IDN mós entrega prenda ba Sr. Francisco Maia, Cmmm. Estudante estajiu sira mós hatudu sira nia gratidaun liu husi entrega prenda ba IDN, ho foto hamutuk. #MédiaIDN
|
|
