Díli, 10 Jullu 2025 — Diretór Interino Institutu defeza Nasional hamutuk ho ekuipa hetan vizita Kortezia husi Diretór Universidade Defeza Nasionál Malázia Prof. Dato Dr. Ahmad Mujahid, ho prof Dr. Ananthan Dosente Superiór husi Fakultade Siénsia no Teknolojia Defeza, iha Institutu Edukasaun Ezekutivu NDUM.
Iha enkontro ne’e Diretor Interino hato’o nia apresiasaun ba Delegasaun NDUM ba sira-nia vizita mai IDN. Fundamentu husi ekontru ne’e fó énfaze ba fortalese kooperasaun entre NDUM no IDN (Instituisaun Defeza Nacional Timor-Leste).
Delegasaun NDUM hatudu interese atu halo parseria ho IDN, liu husi oportunidade iha formasaun, apoiu tékniku, no programa kadete konjunta. Hala’o kooperasaun ida ne’e, bele lori parte importante ba estudante IDN atu kontinua formasaun iha Malázia, tuir kritéria no rekezitu sira ne’ebé NDUM estabelese.
Iha diskusaun ne’e, IDN propoin no apresenta programa kursu akademia konjunta integradu no mós kursu Mestrado ida ne’ebé sei hala’o iha tinan oin.
Kooperasaun ne’e, sei sustenta dezenvolvimentu programa formasaun bazeia ba nesesidade espesífiku IDN, inklui oportunidade ba pesoál Timor-Leste atu kontinua mestradu, doutoramentu no programa sira seluk iha universidade públika iha Malázia.
NDUM mós husu ba IDN atu propoin area kooperasaun, ne’ebé IDN bele identifika hodi halo proposta formal ba NDUM. Parte importante iha enkontru ne’e, fó asisténsia ba IDN kona-ba dezenvolvimentu institusional hanesan NDUM, no dezenvolvimentu programa akadémiku ne’ebé bele iha kolaborasaun.
Iha enkontro ne’e, diretór IDN Dr. Nuno Corvelo Sarmento, ne’ebé akompaña husi Diretór Ensinu no Formasaun Kapitaun Fragata Graduadu Nicolao Sousa Guterres, Diretora Servisu Akademia Dra Eunice Noronha, Diretór Diresaun Investigasaun Dezenvolvimentu Inovasaun Dr. Guilherme Soares, Kordenador Kursu Superintende Xefi Antonio de Sa no Asesor.
Parte lokraik delegasaun ne’e, hetan akompaña husi IDN, vizita Muzeu Rezistensia ho Objetivu atu hetan kompriensaun kle’an liután kona-ba istória Timór-Leste nian, liuliu luta ba independénsia, atu apresia reziliensia no sakrifísiu povu Timor-Leste nian. objetivu seluk atu promove konsiénsia istórika, apresiasaun kulturál no respeitu ba malu entre delegasaun no povu Timor-Leste. #MédiaIDN
|
|
