Batugade, 30 Setembro 2025 –Diretór Interinu Institutu Defeza Nasionál (IDN), Dr. Nuno Corvelo Sarmento, partisipa iha serimónia Aniversáriu Unidade Patrullamentu Fronteira (UPF) ba dala 23, ne’ebé realiza iha Kuartél UPF Fatuk Boot, Batugade, Munisípiu Bobonaro, iha tersa-feira ne’e.
Unidade Patrullamentu Fronteira (UPF), nudar unidade espesial husi Polísia Nasionál Timor-Leste (PNTL), iha responsabilidade espesiál atu halo patrullamentu no kontrola movimentu ema iha área fronteira. Misaun UPF inklui vigilânsia fronteira terestre tomak no koordenasaun ho forsa seguransa sira seluk.
Partisipasaun IDN iha evento importante ida ne’e, fó kontribuisaun ba fortalecimento relasaun kooperativa entre Instituisaun Defeza no Seguransa, hanesan F-FDTL, PNTL no UPF. No mostra unidade no solidariedade entre IDN, nudar parte husi F-FDTL, no UPF. Kooperasaun ne’e konsidera importante atu hadia no sustenta seguransa nasionál.
Tan ne’e ho Partisipasaun IDN iha Aniversáriu UPF fó oportunidade atu promove funsaun no misaun IDN, liu-liu iha aspektu edukativu no kontribuisaun ba formasaun lideransa iha área defeza no seguransa.
Ida ne’e mos fó oportunidade ba estudante sira husi IDN atu aprende direitamente husi observasaun no interasaun iha terenu, hodi komprende kontestu seguransa iha área fronteira.
Partisipasaun IDN mós hadia konsiénsia hosi komunidade no instituisaun seluk kona-ba papel IDN nudar instituisaun edukasaun defeza, no hanesan forma atu fó valor ba kontribuisaun UPF iha defende fronteira nasionál.
Serimónia ne’e hetan partisipasaun husi Komandante Jerál PNTL, Komisáriu Henrique da Costa, Reprezentante F-FDTL, Koronel Helder da Costa; Diretór IDN, Dr. Nuno Corvelo Sarmento, Xefi Administrador BNPP PLBN Mota Ain, Dra. Maria Fátima Rika, S. Stp, Reprezentante TNI no Polri Indonézia, alunu husi eskola Batugade no membru família UPF sira. #MédiaIDN
|
|
