Díli, 6 Outubru 2025 –Institutu Defeza Nasionál Timor-Leste (IDN), liuhusi Diretór Diresaun Investigasaun, Dezenvolvimentu no Inovasaun (DIDI), Dr. Guilherme Soares, no Diretór Diresaun Ensinu no Formasaun, Kapitaun Fragata Graduadu Nicolao Sousa Guterres, hala’o enkontru online ho Universidade Defeza Nasionál Malaysia (UDNM), Segunda-feira, iha ambitu preparasaun ba transformasaun ba ensino superior liu husi plano hodi halo formasaun ba dosente iha IDN.
Liu husi oportunidade enkontru ne’e, IDN no UDNM diskute kooperasaun futuru iha área edukasaun militár no dezenvolvimentu lideransa. Programa nee rasik hola parte iha politika no orientasaun husi PM Malaysia nian Dr. Anwar Ibrahim hodi apoio ba adesaun Timor-Leste nian ba iha ASEAN inclui apoio iha area recursos humanos.
Proposta programa foca ba area hanesan formasaun iha curto prazo, halo visita alunos no docente e trabalho de pesquisa conjunta iha area de interese mutua. Parte importante tan, IDN ho UDNM debate preparasaun atu asina Memorandu Entendimentu (MoU) iha tempu mai, antes realiza atividade sira mensiona.
Institutu Defeza Nasionál husu mós UDNM nia kolaborasaun atu fó apoio formasaun iha curto prazu Programa Estudu ASIA nian, Conferencia nian, ba alunos CEMCI sira mak halo hela formasaun iha IDN.
Objetivu prinsipal husi enkontru online ne’e mak atu hametin kooperasaun no relasaun institusionál entre IDN ho Universidade Defeza Nasionál Malaysia (UDNM), liuhusi troka esperiénsia, metodolojia formasaun, no kualidade lideransa iha setor seguransa no defeza. Enkontru ne’e bele mós konsolida kapasidade teknika no akademika ba formadór no estudante sira iha IDN.
Enkontru ne’e bele fó vantajen ida boot ba IDN, hanesan aumenta koneksaun internasionál ho institusaun akademika defeza nasaun seluk, fó asesu ba estudante sira atu simu informasaun atual iha nivel globál, motiva formadór no estudante sira atu kontinua aprendizajen, no troka-an esperiénsia ho profesionais iha ho rai seluk.
Parte rua hato’o esperansa katak enkontru ne’e sei sai fatin importante ba hametin kolaborasaun no preparasaun asina Nota Entendimentu ba programa nebee iha concordansia hamutuk. #MédiaIDN
|
|
