Díli, 24 Juñu 2025 – Sua Exelénsia Ministru Defeza, Profesór Doutor Kontra-Almirante Donaciano Costa Gomes “Pedro Klamar Fuik”, akompaña husi Komisáriu Portofóliu Forsa Traballu Komisaun Funsaun Públika (KFP), Dr. José Telo Soares Cristovão, fó posse ofisiál ba Konsellu Administrasaun foun Institutu Defeza Nasionál (IDN), iha auditóriu IDN, Palásiu Governu, Dili.
Membru Konsellu Administrasaun foun ne’e hanesan Dr. Nuno Corvelo Sarmento ba Diretór Ezekutivu Interinu IDN , Dra. Josefa dos Reis Gonçalves hanesan Diretóra Jerál Jestaun no Rekursu, no Kapitaun Fragata Graduadu Nicolau Sousa Guterres hanesan Diretór Ensinu no Formasaun.
Iha serimónia ne’e, Ministru Defeza hateten katak, membru foun sira tenke hala’o reforsu institusionál atu transforma IDN ba instituto ensinamentu superior iha area Defeza Nasionál. Transformasaun ida ne’e, sei fó baze akademika ba formasaun siénsia militar, seguransa no lideransa sivil.
Ministru Defeza esplika katak, kuadru jurídiku atu transforma IDN sei hela iha Presidénsia Konsellu Ministru, no sei hein deit aprovasaun hosi Konsellu Ministru. Alénde kuadru legál, preparasaun ba rekursus humanus no infraestrutura mós prioridade.
“Presiza fó kampus foun atu sustenta formasaun ba lider sira iha nivel militar, polísia, funsaun públika no lideransa nasionál,” hateten Ministru defeza Pedro Klamar Fuik.
Iha oportunidade hanesan, Komisáriu KFP, Dr. José Telo Soares Cristovão, sente previléjiu marka presensa iha serimónia ne’e, no haktuir katak komisaun funsaun públika sei kontinua fó suporta ba IDN iha aspetu rekutamentu no promosuan lideransa.
Diretór Ezekutivu Interinu IDN, Dr. Nuno Corvelo Sarmento, hato’o agradesimentu no hateten sei fó kontinuidade ba programas IDN, ho koordenasaun ho Ministériu Defeza.
Hanesan Diretór ezekutivu Interinu IDN, Sertamente iha programa barak no todan maibe ho esforsu ekipa no jestaun ida ne’ebe di’ak, sente katak programa sira ne’ebé Instituto ne’e iha espera, bele alkansa to’o finalidade.
Tanba Visaun no misaun IDN, halai liu ba area formasaun, no kapasitasaun ba rekursu humanus, la’os de’it ba ita ninia rekursus defeza no seguransa nian deit, maibe inklui mós kuadrus Sivil sira, hodi forma lideransa ne’ebe diak para depois lori ita nia nasaun ne’e ba oin.
Bazeia ba dadus husi IDN relata , durante tinan 15, fó ona formasaun ba partisipantes hamutuk 1.471, iha area defeza no seguransa nasional , hahu husi primeiru to’o sestu Kursu promosaun ofisial superior (CPOS). Primeiru to’o Kuadru Kursu Estadu Maior Konjunta Integradu (CEMCI). Kursu seguransa no defeza nasional ba Xefi Suku 452. Formasaun governasaun estratéjika ba lider estadu sira. Lansa Mestradu iha Seguransa no Dezenvolvimentu Sustentável. Primeira kursu Kapitaun Portuária. Kursu Emprendedorismu ba emprezariu sira ne’ebé hamahon an iha Kamar komersiu Industri Timor Leste, no formasaun ba joven universitariu sira, inklui joven patriotismu sira.
Serimónia ne’e remata ho entrega sertifikadu rekoñesimentu ba Diretór Interinu sesante nain rua hanesan Dr. Guilherme de Jesus da Costa Soares no Kapitaun Fragata Duarte Borges Loe, PhD., husi Sua Exelénsia Ministru Defeza Contra- Almirante Donaciano da Costa Gomes, no Xefe Estadu Maior F-FDTL, Tenente Jeneral Domingos Raul “Falur Rate Laek”, hanesan sinal onra ba kontribuisaun sira iha IDN.
Serimónia ne’e mos partisipa husi Sua Exelénsia Xefe Estadu Maior F-FDTL Tenente Jenerál Domingos Raul “Falur Rate Laek”, reprezentante PNTL,Alunos 4CEMCI, asesór no funsionáriu IDN. #MédiaIDN
|
|
