Díli, 20 Novembru 2025 – Parlamentu Nasionál (PN) aprova Orsamentu Jerál Estadu ba tinan fiskál 2026, ho montante $1,610,388 ba Institutu Defeza Nasionál (IDN). Aprovasaun ne’e, akontese durante debate faze espesialidade, ho rezultadu 43 votus a favór, 0 kontra no 20 abstensaun.
Proposta OJE 2026 ba IDN ne’e aprezenta husi Sua Exelénsia Ministru Defeza, Kontra-Almirante Donaciano Costa Gomes “Pedro Klamar Fuik”, Ph.D., ne’ebé akompaña husi Diretór Interinu IDN, Dr. Nuno Corvelo Sarmento, Diretóra Jerál Jestaun Rekursu, Dra. Josefa dos Reis Gonsalves, no Diretór Diresaun Investigasaun, Dezenvolvimentu no Inovasaun (DIDI), Dr. Guilherme Soares.
Aprovasaun orsamentu ida ne’e iha vantajen estrategiku ba IDN, ho objetivu atu, assegura kontinuidade formasaun profisionál iha área seguransa no defeza. Hadia kapasidade lideransa hosi ofisiais PNTL no F-FDTL, no ajente sira husi Funsaun Públika. Aumenta kompeténsia téknika no prepara líder sira ba tinan oin.Hamutuk dezenvolve peskiza polítika seguransa, doktrina, no estratéjia defeza. Hamutuk fó kontribuisaun IDN ba melhora qualidade polítika seguransa nasionál.
Aprovasaun ho 43 votus favór no la iha votus kontra, hatudu apoiu polítiku forte hosi Parlamentu ba IDN, no reforsa konsensu kona-ba importánsia instituisaun ne’e iha sistema seguransa nasional. Prosesu ida ne’e mós evidénsia transparénsia no pratika demokratika iha jestaun orsamental. #MédiaIDN
