Metinariu -14 Abril 2025 – Ho laran moras no triste profunda, oan ki’ak, família, parentes, kolega sira, hamutuk ho família bo’ot Instituto Defeza Nasionál (IDN) no estudante sira husi Universidade Nasionál Timor Lorosa’e (UNTL), akompanha mate isin Professór Doutór José Antonio Lourenço da Costa, hodi ba halot iha Jardim dos Heróis Metinaru, Díli.
Molok ba halot iha Jardim dos Heróis, maktoban saudozu ho naran família, Dr. Zeto, lori ba halo misa sagrada iha Igreja Motael. Depóis, prosesu vizita ba Kampus Sentral UNTL no IDN hodi hetan prestasaun homenagem ikus.
Prosesu despedida kontinua liu husi Kampus FASPOL UNTL iha Kaikoli, hodi halo prestasaun homenagem. Depóis, vizita ba Komité 12 Novembru iha Semitériu Santa Cruz, hodi fó respetu ba kontribuisaun no luta saudozu Dr. José Antonio Lourenço da Costa.
Ita hotu foo despedida ikus no saudozu nia mate isin nia ne’ebé halot ona iha Jardim dos Heróis Metinaru. Deskança iha Maromak nia kadunan santu, Professór Doutór José Antonio Lourenço da Costa. Ita sei kontinua hakerek ita nia istória iha ami tomak nia jornada moris.
Maktoban, moris iha loron 22 fulan-Jullu tinan 1970. Hakat tuir sertidaun batizmu, nia moris iha Postu Administrativu Fatumean, Munisípiu Covalima, tanba iha tempu ne’ebá, nia inan servisu hanesan enfremeira iha postu referidu.
Saudozu mak oan husi Sr. Emililo da Costa Ximenes no Senhora Maria de Lourdes Boavida husi Bukoli, Munisípiu Baucau. Nia mak oan ba datolu husi maun-alin na’in 9, mane lima no feto haat.
Iha tinan 1995, Dr. Zeto harii uma-kain ho Ligla Deonela de Araújo (matebian). Husi matrimóniu ne’e, sira iha oan nain hitu oan nain rua fila ba Maromak, hela agora oan nain lima.
Saudozu ne’ebé respeitadu ho naran Dr. Zeto, remata nia vida iha loron 9 Abril 2025, iha Hospital Nasional Guido Valadares (HNGV), tuir oras 12:00 meio-dia, ho tinan 54. Antes hetan moras, nia desmaia no monu iha auditóriu Kampus Faculdade de Ciências Sociais UNTL, iha dadeer loron kuarta-feira, tuir tuku 9:00.
Durante tinan barak, saudozu mós , sai nudar dosente ne’ebé hanorin alunus no eis alunus sira , mai husi ofisial PNTL ho F-FDTL ne’ebé partisipa formasaun iha Institutu Defeza Nasionál. familiar tebes ho estrutura IDN ho funsionariu sira. Nune’e Sua exelénsia Ministru Defeza Kontra Almirante Donaciano do Rosário da Costa Gomes Ph.D, mós entrega sertifikadu rekoñesimentu ba maktoban Dr. Zeto nia mama, ba kontribuisaun ne’ebé saudozu presta ba IDN, hanesan dosente ba Ofisiais husi F-FDTL no PNTL.
Kareira akademika maktoban Prof. Doutor José António, MA,SSi, iha vida profisional termina nia Lisensiatura iha UNTIM, Mestradu iha Lisboa no Doutoradu iha Évora Portugal.
Saudozu hanesan mós Membru movimentu estudante kontra okupasaun, ativista organizasaun oioin. Iha tinan 10 ikus maktoban, fó atensaun liu ba mundu investigasaun, hakerek livru, fo aulas no publikasoens. #MediaIDN
|
|
