Díli, 29 Maiu 2025 – Alunus Kursu Estadu Konjunta Integradu ba dala 4, kontinua matéria aprendizajen Ekonomia Defeza, liu husi aprezentasaun grupu iha materia jerál Jestaun no Administrasaun Rekursu, ne’ebé hanorin husi Koronel Reformadu Sampaio Silva.
Aprezentasaun ne’e fahe ba grupu lima, ho tópiku sira ne’ebé foku ba aspéktu sira diferénti kona-ba Forsa Seguransa no Defeza. Grupu I aprezenta kona-ba prosesu rekrutamentu iha FALINTIL-Forsa Defesa Timor-Leste (F-FDTL), Grupu II aprezenta kona-ba rekrutamentu iha Polísia Nasionál Timor-Leste (PNTL), Grupu III foku ba formasaun no kapasita membrus F-FDTL, Grupu IV aprezenta kona-ba avaliasaun dezempeñu iha PNTL, no Grupu V fó enfáze ba sistema avaliasaun dezempeñu iha F-FDTL.
Objetivu prinsipal husi aprezentasaun grupu ne’e, atu hatudu no partilha informasaun kona-ba tópiku sira ne’ebé grupu sira halo peskiza no prepara, atu aumenta komprensaun no koñesimentu husi audiénsia kona-ba kontestu no importansia tópiku sira referidu.
Atividade ne’e mós ,uza tan atu promove diskusaun entre membru sira ho audiénsia, troka hanoin no sentimentu kona-ba reálidade no dezenvolvimentu iha area seguransa no defeza. Aprezentasaun grupu ne’e, reflete kolaborasaun efikásia entre membru sira, no ajuda dezenvolve abilidade komunikasaun kolektivu entre alunus sira. #MédiaIDN
|
|
