Díli, 6 Maiu 2025 – Diretór Interinu Institutu Defeza Nasionál (IDN), Kapitaun Fragata Duarte Borges Loe, remata ho susesu ezame final (ujian terbuka) ba disertasaun doutoramentu iha Universidade UNTAG, Surabaya, Indonézia.
Disertasaun doutoramentu ne’e ho topiku: “Influénsia Teknolojia Finanseira, Karakterístika Personalidade no Literasia Finanseira ba Atitude Finanseira, Orientasaun Poupansa Pesoál no Planeamentu Finanseiru Família Nian, ne’ebé Modera husi Kuosiente Finanseiru entre Família Naval sira iha Baze Naval Hera, Timor-Leste.”
Kapitaun Fragata Duarte Borges Loe mak ofisiál superior iha FALINTIL–Força Defeza Timor-Leste (F-FDTL), ho esperiénsia hanesan eis Komandante Navio Jaco no Komandante Esquadrilha Naval. Agora, nia okupa pozisaun hanesan Diretór Interinu IDN.
Ne’ebé remata títul akademiku Doutoramentu ho susesu iha Faculdade Siénsia Ekonomia, área Jestaun Estratéjiku, Universidade UNTAG.
Diretór Interinu IDN, Duarte Borges Loe, moris iha Postu Administrativu Cailaco, Munisípiu Bobonaru, iha loron 24 Janeiru 1983. Nia remata estudu lisensiatura iha área Relasaun Internasionál iha Universidade da Paz (UNPAZ) iha tinan 2009. Nia kontinua mestradu iha área ne’e iha tinan 2013, no iha tinan 2017 remata mestradu tan iha área Inovasaun no Jestaun Estratéjiku iha Universidade Salve Regina, EUA. Iha tinan 2021, nia remata tan mestradu iha área Estudu Militár no Defeza iha Australia War College.
Tinan 2025, nia susesu remata Doutoramentu iha área Ekonomia no Jestaun Estratéjiku iha Indonézia, ne’ebé lori orgullu ba IDN no F-FDTL.
Iha momentu importante ida-ne’e, reprezantante IDN, Dr. Nuno Corvelo Sarmentu, hamutuk ho família boot IDN hato’o parabéns no kontente boot ba susesu akademiku Kapitaun Fragata Duarte Borges Loe. Susesu ida ne’e prova klaru ba nia kompromisu, dedikasaun no ezelénsia akademika.
Rezultadu ne’e sei fó inspirasaun ba profesionais sira seluk iha IDN no sosiedade nian, no marka fase foun iha viajen profesionál hodi kontribui ba dezenvolvimentu Timor-Leste nian. #MédiaIDN
|
|
