IDN Gradua Alunus Finalista Na’in 33

Alunus finalista na’in 33, mai husi Terseiru Kursu Estadu-Maior konjunto Integradu hamutuk na’in 15, mai husi Superintendente Asistente polísia na’in 4, husi Polísia Nasionál Timor Leste (PNTL), no Major no Kapitaun Tenente no Kapitaun Fragata hamutuk na’in 11, mai husi FALINTIL Forsa Defeza Timor Leste (F-FDTL).

Aktividade akademia ba Terseiru Kursu Estadu-Maior Konjunto Integradu, Institutu Defeza Nasionál, hahu abertura iha loron 3 Abril, tinan 2024, ho unidade kurikular hamutuk 25, ne’ebé hanorin husi dosente nasionál no internasional ba partisipantes sira to’o mai, vizita estudu, ezame monografia, to’o aktividade konferénsia.

objetivu jerál husi kursu ne’e, atu prepara ofisiál seniór sira ho tékniku apoiu ba komandu no desizaun ne’ebé presiza atu ezerse funsaun komandu, no órgaun sira husi Estrutura Superior F-FDTL, PNTL.

Fornese sira-nia vizaun jerál kona-ba realidade no buka atu esplora sira-nia esperiénsia, koñesimentu sientifika e téknika, akumuladu iha tinan hirak-ne’e, tanba sira-nia dezempeñu karreira sira, hodi asegura sistematizasaun koñesimentu ba dezenvolvimentu individuál no aprendizajen ne’ebé adekuadu ba dezempeñu funsaun sira iha futuru.

Preparasaun pesoál sira ne’ebé kualifikadu tama iha estrutura hierarkika, ho abilidade atu suporta foti desizaun iha situasaun risku no inserteza sira ne’ebé topiku ba kombate armadu, operasaun apoiu sivíl no iha kumprimentu misaun seguransa interna no esterna sira, hodi hatán ba rekizitu sira ba Seguransa Nasional no Defeza.

Nune’e mós alunus finalista husi Primeiro Kursu Kapitaun Portuaria hamutuk na’in 18, mai husi Autoridade Nasionál Maritima (AMN) na’in 6, Unidade Polísia Marítima PNTL na’in 5, Sentru Formasaun Polísia Komoro na’in 1, Unidade Komponente Naval F-FDTL na’in 2, Autoridade Nasionál Portuariu na’in 4.

Tuir kalendáriu akadémiku husi Diresaun Ensinu Formasaun IDN, aktividade akademia ba kursu ne’e, lao fulan tolu, hahú husi Dezembru 2024 to’o Marsu tinan 2025. Ho unidade kurikular 9, ne’ebé hanorin husi profesór Nasionál no internasionál sira.

Objetivu jerál husi kursu ne’e, kontribui ba protesaun interese Timor-Leste ni’an iha tasi, hodi garante ezersísiu autoridade marítima ida ne’ebé efisiente no efikás. kapasita autoridade marítima sira hodi fasilita sira nia misaun seguransa no defeza ni’an , iha teritóriu marítimu Nasaun nian.

Objetivu Espesífiku husi Kursu ne’e, atu fó formasaun ba Kapitaun Portuáriu sira iha Timor-Leste ho koñesimentu teóriku no prátiku ne’ebé esensiál ba hala’o sira-nia kna’ar. Kapasita profisionál sira, atu sai nu’udar asistente ba Kapitaun Portu sira no okupa pozisaun lideransa no jestaun nian iha Komponente Naval F-FDTL nia laran.

Promove seguransa marítima no soberania nasaun nian, hodi garante katak autoridade timoroan sira iha ferramenta nesesária atu ezerse sira-nia jurisdisaun marítima ho efetivu.

Liu husi aktividade akademia ne’e mós, Institito Defeza Nasionál hala’o mós abertura ba, Kuatru Kursu Estadu Maior Konjunto Integradu hamutuk alunus na’in 14. iha loron 7 Marsu tinan 2025, hodi kontinua formasaun ba tinan akadémia 2025 to’o 2026 ba período minimu fulan 9. No maximu tinan ida.

Partisipantes na’in 14 ne’e, mai husi Polísia Nasionál Timor Leste ho Postu Superintendente Assistente ho Superintendente na’in 5. No na’in 9 mai husi FALINTIL Forsa Defeza Timor Leste (F-FDTL) ho postu Majór na’in 6 husi Komponente Terestre, no Kapitaun Tenente na’in 3 husi Komponente Naval.

Kuatru Kursu Estadu Maior Konjunto no Integradu, hanesan kursu kualifikasaun ida-ne’ebé ho objetivu prinsipál ba ofisial seniór sira husi FALINTIL – Forsa Defeza Timor-Leste (F-FDTL) ne’ebé hatudu katak iha poténsia atu hala’o funsaun ka pozisaun sira durante sira-nia karreira.

Kualifikasaun Ofisial Senior, Treinamentu ba ofisiál seniór sira atu hala’o funsaun sira iha nivel operasionál no estratéjiku iha funsionáriu jerál konjunto sira, nasionál no internasionál, no iha estrutura seniór sira F-FDTL nian, Defeza Nasional, PNTL, no mós iha organizasaun nasionál no internasionál sira.

Atualiza no standariza abilidade tékniku-militar no polísia ba koñesimentu husi ofisiál seniór sira husi F-FDTL ho PNTL ni’an, hodi asegura sira , aliña ho prátika di’ak no padraun internasionál sira.

Liu husi diskursu, Xefi Estadu Maior Jenerál FALINTIL Forsa Defeza Timor Leste (F-FDTL) Tenente Jenerál Domingos Raul “ Falur Rate Laek,” afirma Ohin, lori orgullu ne’ebé signifikadu boot ba ofisial Polísia Nasional Timor Leste (PNTL) no FALINTIL-Forsa Defeza Timor Leste (F-FDTL) no funsionariu publiku sivil sira hotu, ne’ebé partisipa kursu iha IDN. To’o konklui ona edisaun ba dala tolu Kursu Estado-Maior konjunto Integradu, nune’e mós edisaun dahuluk ba kursu kapitaun portuaria, liu husi oportunidade ne’e, ha’u nia felisitasaun no parabens ba graduadu husi kursu rua.

Liu husi serimonia solene ne’e, marku jornada foun ba aprendisajen maibe mós, tempu atu reflete kona ba realizasaun sira iha passadu estabelese objetivu ba futuru oin mai. Tanba Iha ambitu instituto Militar iha mundu tomak, kursu komando no Kursu estado maior, reprezenta pontu a’as liu, husi kursu lideransa no Jestaun sira.

Xefi Estadu Maior Jenerál F-FDTL Tenente Jenerál Falur Rate Laek, hatutan, Lideransa ne’e arte ida ho nune’e, bele aprende mós ho arte sira seluk, Bazeia ba dezenvolvimentu karakterisitka personalidade individual no konpreensaun ba aplikasaun prinsipiu no tekniku lideransa ne’ebe solidu.

Tanba Arte lideransa militar nian bele aprende, dezenvolve no pratika ho grau oioin, husi ema ne’ebé iha motivasaun ho abilidade, mental, fisika no integridade moral. Dezenvolvimentu arte ida ne’e, mak prosesu ida ne’ebe kontinua.

Nune’e ba futuru, ita mai husi istória ne’ebe naruk no moruk, entaun situasaun defeza seguransa, kontinua hetan formasaun konjunta, lori mensajen forsa Defeza no Seguransa hamutuk, para bele sai koluna vertebral ba patrotismu nasional soberania nian mak sira. Tamba ne’e, mak ha’u haksolok no parabens ba Instituisaun Defeza Nasionál ne’ebé fó formasaun ho realidade ita nian rasik.

Tempo hanesan mós Diretór Interinu Instituto defeza Nasionál Dr. Guilherme Soares salente , Serimonia ohin faz parte husi visaun no misaun husi Instituto defeza Nasionál rasik, ne’ebé hatuur iha dekretu lei numeru 12 de 2010, iha 26 de agostu hodi hatuur pilar sira importante hanesan tuir mai, Dezemvolvimentu Rekursus humanus ba ita nia forsas armadas, forsas servisus de seguransa ba ita nia administrasaun publika, sociedade sivil sira iha asuntu de defesa seguransa nian.

Nune’e ohin IDN taka aktividade akademia iha tinan anu letivu 2024-2025 ho Terseiru Kursu Estadu maior konjunto Integradu ho alunus finalista na’in 15 hetan gradusaun, no mós primeiru Kursu kapitaun Portuaria ho alunus finalista na’in 18 maka hetan graduasaun. No IDN mós halo abertura ba Kuatru Kursu Estadu maior Konjunto Integradu ba tinan anu letivu 2025 to’o 2026 ho alunus na’in 15.

Entretantu durasaun ba Kuatru kursu Estado-Maior Konjunto Integradu durante semana 40 no fulan 9, ho komponente 4, mai husi , komponente base, komponente espesifiku , sei iha aulas separa alunus F-FDTL ho PNTL, hodi aprende kona ba matéria Siénsia Militar no Siénsia polísial, no komponente konjunta integradu ( alunus sira aprende ameasas naun Tradisional sira, inklui Jeo Estratejia no Jeo Politika.

Partisipa iha serimonia gradusaun ne’e, mai husi reprezentante Ministru Defeza Chefe Gabinete, Sra Ana Carrascalão Gomes , Xefi Estadu Maior Jenerál FALINTIL Forsa Defeza Timor Leste (F-FDTL) Tenente Jenerál Domingos Raul “ Falur Rate Laek,” Xefi Estadu Maior F-FDTL Brigadeiru Jenerál José da Costa Soares “Trix, ”Reprezentante husi Ministru Interior Sr Paul Martins, no reprezentante husi Komandu PNTL Superintendente Xefi Arquemino Ramos, Reprezentante husi Ministerio Negocio Estrageiro, Dr. Liborio Pereira, Reprezentante husi Ministério Ensinu Superior, atual Diretór Jerál ba Polítika Defeza Nasionál Dr Nuno Carvalho do Santos, Diretor Jerál Rekursu ba Defeza Dr Martinho Moniz husi Ministériu defeza no mós reprezentante husi Fundu dezenvolvimentu kapital Umanus (FDCH) korpu dosente sira ho familia graduadu . #MediaIDN