Díli, 27 Agostu 2025 – Diretór Ezekutivu Interinu Instituto Defeza Nasionál (IDN), Dr. Nunu Corvelo Sarmento, akompaña husi Diretóra Jerál Jestaun no Rekursu Umanu, Dra. Josefa dos Reis Gonsalves, Diretór Didi, Dr. Guilherme Soares, Diretóra Akademika, Dra. Eunice Noronha, no Asesór, Dr. José Manuel Fernandes, halibur ho delegasaun husi organizasaun G7+, lidera husi Sekretáriu Jerál Dr. Helder da Costa, iha enkontru ofisiál ne’ebé realiza iha Auditóriu IDN, Palásiu Governu, iha Díli.
Enkontru iha loron kuarta-feira ne’e iha objetivu atu diskute kooperasaun IDN ho G7+, no mós preparasaun ba serimónia importante tolu ne’ebé sei organiza IDN iha loron 30 Agostu 2025 iha área Huldolte, Suku Liurai, Postu Administrativu Aileu Vila, Munisípiu Aileu.
Aleinde ne’e , IDN prepara konferénsia ida kona-ba “Asuntu Tasi”, ne’ebé sei organiza iha fulan Novembru 2025. Iha konteksu ida ne’e, IDN buka orador sira nasionál no internasionál, no mós moderador sira ne’ebé bele kontribui ba diskusaun iha konferénsia referidu.
Iha oportunidade hanesan, Dr. Helder da Costa propoin proposta atu halo akordu parseria entre IDN no organizasaun G7+, hodi reforsa kolaborasaun iha formasaun profisionál no kapasita ba jenérasaun foun liu husi IDN.
Parseria ida ne’e bele fó kontribuisaun signifikante ba dezenvolvimentu no estabilizasaun institusionál iha Timor-Leste no iha estadu mós ne’ebé G7+ reprezenta. #MídiaIDN
|
|
