Díli, 20 Juñu 2025 – Komponente Aéreo husi FALINTIL–Forsa Defeza Timor-Leste (F-FDTL) realiza Palestra ba dahuluk iha Sesta -feira ne’e, iha auditóriu Quartel Jeral F-FDTL, Fatu Hada, Díli hodi selebra Aniversariu ba dala 4 ne’ebè sei halao iha loron 23 Jun̈u 2025 iha Aereoportu Baucau.
Iha aktividade palestra ne’e hetan partisipasaun husi Diretor Interinu Institutu Defeza Nasionál (IDN), Dr. Nuno Manuel Corvelo Sarmento, ho alunus Kursu Estado Maior Konjunta Integradu ba dala 4, ne’ebé agora partisipa formasaun iha Institutu defeza Nasionál. Inklui mós peritus pilotu husi Kompaña Aéro Díli Sr Bambang , sosiedade sivil, no estudante sira, hodi fó sira-nia kontribuisaun hanoin ba dezenvolvimentu ba Komponente Aéreo iha futuru.
Palestra ne’e ho objetivu atu reforsa kooperasaun internasionál ho forsa Aéreo sira seluk iha rejiaun no mundu, aprende husi esperiénsia forsa sira seluk no hetan suporti téniku. Aumenta kapasidade profesionál no ténika ba personál Komponente Aéreo F-FDTL liuhusi formasaun, simulasaun no partilha koñesementu. Promove inovasaun no modernizasaun sistema operasionál, inklui aviasaun, radar no sistema komunikasuan. Harmoniza objetivu defeza nasionál ho papél esensiál Komponente Aéreo iha seguransa Aéreo, kontrolu fronteira no resposta ba dezastre.
Komandante Komponente Aéreo F-FDTL, Koronel Helder da Costa, ba Média Nasionál katak tema Palestra ne’e ” Husi Rai To’o Lalehan, Realiza Vizaun FALINTIl- FDTL . Tanba Komponente Aéreo nudar parte importante ida atu kompleta soberania Timor-Leste.
Komponente Aéreo Leijeira husi F-FDTL hala’o papél estratéjiku iha seguransa nasionál. Misaun sira inklui transporta, salvamentu, rekoñesimentu no patrolamentu iha área remota sira. Responde lalais ba situasaun emerjensia, dezastre naturál, asisténsia umanitária no operasaun manutensaun paz. Halo vijilánsia Aéreo iha teritóriu Timor-Leste nian , marítimu no terrestre. Apoiu lojístiku ba unidade rai-maran no tasi nian. Monitoriza área importante hodi proteje rekursu naturál no seguransa fronteira.
CAL iha aviaun leijeira ho medida média hanesan helikópteru sira, no agora mak foka ba formasaun kontinua ba pilotu no ekipa manutensaun. Kooperasaun ho forsa armada sira seluk foin halo F-FDTL hadia estratéjia operasionál no fó pontu forte ba relasaun internasionál.
Iha asesu lalais no fasil transporta ekipamentu no pesu, Komponente Aéreo iha papel vital iha resposta dezenvolvimentu nasionál no ajuda komunidade iha momentu presiza.
Forsa Aérea Leijeira F-FDTL mak unidade esensial iha estrutura defenza Timor-Leste. Nia kontribui ba seguransa, soberania no resposta emergência, hodi hametin paz no estabilidade iha rai laran.
Partisipa iha konferensia, mai husi Xefi Estadu Maior Jenerál Forsa Armadas, Tenente Jenerál Domingos Raul “Falur Rate Laek”, Xefi Estadu Maior Forsa Armadas José da Costa Soares “TRIX”, Sua Exelénsia José Agostinho “Sequeira”, no ofisial husi F-FDTL sira. #MédiaIDN
|
|
