Aileu, 3 Jullu 2025 – Sua Exelénsia Ministru Defeza, Kontra-Almirante “CMD” Donaciano Costa Gomes, Ph.D, hala’o observasaun ba espasu ne’ebé planeadu atu hari Eskola Akademia Konjunta iha área entrada Hundolte, suku Liurai, Munisípiu Aileu.
Sua Exelénsia Ministru Defeza, akompaña husi Diretór Ezekutivu Interinu IDN, Dr. Nuno Corvelo Sarmento, Diretóra Jerál Jestaun no Rekursu,Dra. Josefa dos Reis Gonçalves, Diretór Ensinu no Formasaun, Kapitán Graduadu Nicolau Sousa Guterres, Asesor Dr. José Manuel Fernandes ho Dra. Eunice Noronha.
Objetivu principal husi observasaun ne’e, atu marka espasu definitivu fatin ne’ebé Instituto Defesa Nasionál (IDN) sei uza iha prosesu dezenvolvimentu no formasaun Eskola Akademia Konjunta. Vizita ne’e mós hatudu katak IDN sei komesa aselera projetu hari kampus foun IDN iha Aileu.
Tuir Diretór Ezekutivu Interinu IDN, Dr. Nuno Corvelo Sarmento, IDN simu hela orientasaun husi Sua Exelénsia atu komesa sukat espasu no prepara ba fase inisia projetu. Espasu ne’e lokaliza iha entrda área ne’ebé IDN hahu lansamentu kampus IDN tinan kotuk, ho medida besik hektare ida.
Observasaun ne’e mós akompaña husi ekipa teknika IDN, atu halo levantamentu terenu, dezeñu planu konstrusaun, no koordinasaun ho Autoridade Administrativa Munisípiu Aileu ho Diresaun Terras Propriedadi. Nune’e bele hahu konstrusaun iha tempu badak, tuir vizãu no planeamentu husi Sua Exelénsia Ministru Defeza. #MédiaIDN
|
|
