Díli, 29 Outubru 2025 – Instituto Defeza Nasionál (IDN) hala’o serimónia ofisiál despedida ba Kapitaun Fragata Graduadu Nicolau Sousa Guterres, ne’ebé remata nia mandatu hanesan Diretór Ensino Formasaun. Serimónia ne’e hala’o iha auditóriu IDN, Palásiu Governu, Díli kuarta feira ne’e.
Kapitaun Fragata Nicolau Sousa Guterres asumi kargu hanesan Diretór Ensino Formasaun durante tempu fulan lima, hahu husi fulan Junu to’o Outubru tinan 2025. Durante períodu ne’e, nia kontribui signifikativu iha dezenvolvimentu no implementasaun programa formasaun lideransa militar iha IDN.
Iha serimónia ne’e, Diretór Interinu IDN, Dr. Nuno Corvelo Sarmento, hato’o agradesimentu boot ba Kapitaun Fragata Nicolau Sousa Guterres tanba nia esforsu, dedikasaun no responsabilidade durante servisu iha IDN.
“Ha’u hakarak fó agradesimento ba kontribuisaun no servisu boot ne’ebé Kapitaun Fragata Nicolau fó ba IDN. Nia servisu sei kontinua hanesan ezemplu ba funsionáriu IDN hotu,” dehan Diretór Interinu IDN Dr. Nuno
Aproveita oportunidade ne’e mós Diretór Interinu IDN, Dr. Nuno Corvelo Sarmento hato’o agradesa ba komandante Portugés sira ne’ebé mós hala’o servisu kontinua fó suporti no kolabora iha formasaun sira, liu-liu ba Kursu Estadu Maior Konjunta ba dala 4, ne’ebé IDN hala’o tinan ne’e.
Tempu hanesan Kapitaun Fragata Graduadu Nicolau Sousa Guterres hato’o mós agradesimento ba IDN, liu-liu ba Diretór Interinu Dr. Nuno Corvelo Sarmento, Diretóra Jerál Jestaun Rekursu Dra. Josefa dos Reis, no funsionáriu sira hotu, tanba apoiu no kolaborasaun durante nia tempu servisu iha institusaun ne’e.
“Ha’u senti honra no orgullu servisu iha IDN durante fulan 5. Ha’u kontribuisaun mós espera parte importante iha objetivu IDN nian, tanba IDN hanesan institusaun estratéjiku iha preparasaun lideransa nasional, liu-liu iha área defeza no seguransa,”dehan Kapitaun Fragata Nicolau.
Serimónia despede ne’e remata, ho IDN entrega sertifikadu apresiasaun ba Kapitaun Fragata Graduadu Nicolau Sousa Guterres ho foto hamutuk. #MédiaIDN
|
|
