Díli, 2 Juñu 2025 – Alunus Kursu Estadu Maior Konjunta Integradu (CEMCI) ba dala 4 kontinua estudu kona-ba matéria Direitu Administrativu iha semana ida, ne’ebé hanorin husi Prof. Doutor Avelino Coelho. Sesaun formativu ne’e, hala’o husi loron 2 to’o loron 6 iha auditóriu Institutu Defeza Nasionál (IDN), Páteo Díli.
Tuir introdusaun ne’ebé aprezenta iha klase, Prof. Coelho hateten katak estuda direitu administrativu importante tebes atu kompriende sistema lei no justisa iha sosiedade. “Lei mak ordenamentu morál, sosial no polítiku ne’ebé regula relasaun entre ema,” nia hatete.
Diskusaun importante mós fó enfáse ba pensador klasik sira hanesan Aristóteles, Hobbes, Philip S. James, Grotius, no Tomás de Aquino. Sira-nia kontribuisaun fó base teorétika kona-ba justisa, lei naturál, no estrutura norma sosiál iha laran governansa ida.
Prof. Coelho klarifika mós diferensa entre direitu Direitu Sivíl, Direitu Públiku, Direitu Penal, Direitu Traballu no Direitu Administrativu. Tuir nia, lei nian objetivu mak promove justisa sosiál, ordem, no bem komun. “Justisa nudar virtude fundamental, hakarak promove ekilibríu iha relasaun sosial,” Prof. Coelho hateten, hodi referese ba Aristóteles no Parsons nia teoria norma sosiál.
Estudu ne’e, buka mós atu hamutuk perspetiva etik no legál kona-ba governansa, morál, responsabilidade no valorizasaun justisa iha vida públika. Teoria sira hanesan Teoria Etis husi Subekti, no Teoria Utilitis husi Bentham mós fó enkuadramentu kona-ba objetivu lei nian iha dezenvolvimentu sosiedade.
Atividade akademika ne’e, parte husi programa IDN atu fó kapasidade ba ofisial Polísia no militár atu kompriende no aplika lei nian iha administrasaun públika ho efektivu. #MédiaIDN
|
|
