Aileu, 3 Outubru 2025 –Reprezentante husi Ministériu Defeza hamutuk ho Institutu Defeza Nasionál (IDN) no Prezidente Autoridade Munisípiu Aileu, hasoru malu ho komunidade iha área Aitoin, suku Liurai, posto Aileu Vila, hodi halo konsultasaun kona-ba alargamentu estrada ne’ebé liga ba Eskola Akademia Militar Konjunta iha Hundolte.
Iha konsultasaun ne’e, maioria komunidade hatudu prontidaun atu kontribui ho fó espasu metro 6 ba alargamentu Estrada refere hodi fó autorizasaun ba kompañia atu kontinua halo servisu hodi hadia no ateru Estrada refere.
Maibe tuir planu husi Ministériu Defeza, estrada refere ho planeadu iha alargamentu ho metro 9. Komunidade mós konkorda, maibé fó kondisaun katak uma no propriedades privadu sira ne’ebé afeta presiza konsiderasaun espesiál husi Estadu. Komunidade husu atu prosesu ne’e konsidera direitu propriedade no bele fo satisfasaun ba sira, iha laran mos nia suporta dezenvolvimentu nasionál.
Sekretáriu Asuntu Sosiais no Reprezentante Prezidente Autoridade Munisípiu Aileu, Sr. Rogério da Conceição, fó orientasaun ba Direksaun Servisu Munisípal sira hanesan Ministériu Obras Públicas, Agricultura no Floresta, BTL no Diresaun Terras no Propriedade, atu komesa halo levantamentu husi loron Segunda, 6 Outubru 2025. Relatóriu hosi prosesu ne’e sei submete ba PAM Aileu ho Ministeriu Defeza.
Sessaun Terras no Propriedade husu koordinasaun ho Ministériu Defeza no IDN atu fó informasaun final kona-ba planu mestre estrada nian. Informasaun ida ne’e importante atu fó klaridade ba DNTP antes de publika Títulu Rai ba komunidade sira.
Reprezentante PAM Aileu sujere ba Ministériu Defeza no IDN atu partilha dezenhu planu mestre estrada nian, hodi fasilita traballu ekipa téniku munisípal durante prosesu levantamentu.
Enkontru koordinasaun ne’e hetan partisipasaun husi:
• Reprezentante Ministériu Defeza Dr. Ivonio Marçal de Oliveira.
• Ekipa IDN,
• Reprezentante PAM Aileu Sr. Rogério da Conceição .
• Administrador Postu Aileu Vila,
• Diretores Munisípal husi Ministériu Obras Públicas, Agrikultura/Floresta, Terras no Propriedade, no BTL,
• Xefi Suku Liurai, Xefi Aldeia Hundolte, no komunidade afetadu sira. #MédiaIDN
|
|
