Iha loron 4 fulan-Outubru, tinan 2024, Institutu Defeza Nasionál Timor-Leste (IDN),ho Autoridade Dezenvolvimentu Nasionál (ADN) no konsultór sira husi Pajajaran hala’o enkontru online ho objetivu atu finaliza relatóriu dezeñu ba kampus IDN foun. Projetu ne’e ,krítiku tebes hodi hametin IDN nia infraestrutura no kapasidade operasionál, ho objetivu atu moderniza instalasaun sira no promove estrutura formasaun ba instituisaun universitariu Defeza nasionál Timor-Leste nian.
Maibé, durante enkontru online, mosu obstákulu tékniku ne’ebé halo imposivel atu hala’o análize kompletu no detallu kona-ba dezeñu no planu sira ne’ebé aprezenta.
Difikuldade prinsipál ne’ebé relata maka vizualizasaun limitadu hosi dezeñu sira no detalle tékniku sira hosi planu arkitetóniku sira, tuir plataforma online ne’ebé uza. Elementu importante tebes balun hosi projetu presiza análiza klean liu, maibé labele hala’o tomak iha konferénsia virtuál ne’ebé hala’o.
Ikus liu, IDN, ADN no konsultór sira husi Pajajaran konkorda katak, atu hala’o apresentasaun finál kona-ba detallu tékniku husi dezeñu kampus foun, sira tenke halo enkontru prezensiál. Kompleksidade projetu nian no nesesidade atu halo ajustamentu sira ne’ebé presiza nesesita vizualizasaun direta ba planu sira no modelu dijitál sira, no mós ajustamentu sira hodi permite komunikasaun ne’ebé suave liu entre parte sira ne’ebé envolve.
Tanba ne’e, parte sira konkorda atu muda apresentasaun relatóriu ne’e iha loron 15 Outubru 2024 ne’ebé sei hala’o diretamente iha Dili. Enkontru ida-ne’e sei fó oportunidade atu analiza detalle tékniku sira ne’ebé identifika durante enkontru online ho detalle no kria solusaun ida, hodi garante katak projetu finál entrega padraun aas kona-ba kualidade no funsionalidade.
Impaktu no Avansu
Diretór Interinu IDN ne’e hateten katak maski apresentasaun muda, maibé kompromisu ba kualidade dezenhu ba projetu sei la muda.
Nia subliña katak desizaun atu hala’o enkontru prezensiál ne’e importante tebes atu asegura katak aspetu tékniku no arkitetóniku kampus foun nian sei hetan revizaun no aprovasaun. ADN mós subliña importánsia atu garante katak kampus foun ne’e aliña ho objetivu estratéjiku IDN no Forsa Defeza Timor-Leste nian.
Konsultór sira husi Pajajaran mós iha kompromisu atu prepara materiál nesesáriu hotu-hotu atu lori ba enkontru presensial iha Dili, inklui modelu fíziku no maquete detallu sira, ne’ebé sei fasilita análize efetivu liu kona-ba kestaun téknika sira no ajustamentu posivel sira ba projetu.#MediaIDN
|
|
